मुंबई : राज्य सराकरच्या काल झालेल्या मंत्रिमंडळाच्या कॅबिनेट बैठकीवर छगन भुजबळांनी बहिष्कार टाकला. मंत्रिमंडळाच्या बैठकीला उपस्थित न राहिल्याने राजकीय वर्तुळात भुजबळांच्या नाराजीची जोरदार चर्चा झाली. मात्र, छगन भुजबळ नाराज नसल्याचं विधान मुख्यमंत्री देवेंद्र फडणवीस यांनी केलं आहे. ते रायगडमध्ये बोलत होते.

मुख्यमंत्री देवेंद्र फडणवीस हे रायगड दौऱ्यावर आहेत. या दौऱ्यादरम्यान मुख्यमंत्र्यांनी मराठा आरक्षण आणि ओबीसी आरक्षणावर भाष्य केलं. 'मंत्री छगन भुजबळ यांच्यासोबत माझी चर्चा झाली. ते नाराज नाहीत. छगन भुजबळ यांच्या मनातील संभ्रम दूर करू. जीआरमुळे ओबीसी समाजावर परिणाम, अन्याय होणार नाही, अशी ग्वाही मुख्यमंत्री देवेंद्र फडणवीस यांनी ओबीसी समजाला दिली.

'कुणावरच अन्याय होऊ देणार नाही. सरसकट आरक्षणाचा जीआर नाही. काही जण जाणीवपूर्वक संभ्रम निर्माण करत आहेत. मराठा आरक्षणच्या जीआरचे काही ओबीसी संघटनाकडून कौतुक केले. खऱ्या कुणबींनाच या जीआरचा फायदा होणार आहे, असेही त्यांनी सांगितले.

'हा सरसकट जीआर नाही. हा पुराव्याचा जीआर आहे. मराठवाड्यातील पुरावे हैद्राबाद संस्थानात सापडतात. तेथील पुरावे ग्राह्य धरले आहेत. जे खरे कुणबी आहेत. त्यांनाच हे पुरावे सापडणार आहेत. कोणालाही खोटेपणा करता येणार नाही. अशा प्रकारचा जीआर असल्यामुळे ओबीसींनीही त्याचं स्वागत केलं आहे, असे ते म्हणाले.

'छगन भुजबळ यांच्याशी माझी चर्चा झाली आहे. त्यांना मी आस्वस्थ केलं आहे. या जीआरमुळे ओबीसींवर कोणताही परिणाम होणार नाही. भुजबळांच्या मनातील शंका दूर करू. एक गोष्ट ओबीसी नेत्यांना माहीत आहे की, 'जोपर्यंत आमचं राज्य आहे,तोपर्यंत ओबीसींवर अन्याय होणार नाही, असेही फडणवीसांनी सांगितले.