संजय गडदे, साम टीव्ही, प्रतिनिधी

वृद्ध महिलांना लक्ष्य करुन चेन स्नॅचिंग करणाऱ्या सराईत चोरट्याला दहिसर पोलिसांनी बेड्या ठोकल्या आहेत. आरोपीला पोलिसांनी मध्य प्रदेश येथून अटक केली. पोलिसांनी आरोपीकडून चोरी केलेला सर्व मुद्देमाल हस्तगत केला आहे. आरोपी अन्य कोणत्या गुन्ह्यात सहभागी आहे का याचा दहिसर पोलीस तपास करत आहेत.

मिळालेल्या माहितीनुसार, दहिसर पोलिसांनी अटक केलेल्या आरोपीचे नाव ग्यासुद्दीन अब्दुल सत्तर शेख (वय २७ वर्षे) असे आहे. तो मूळचा बिहारचा रहिवासी आहे. मध्यप्रदेशातील बुरहानपूर येथून पोलिसांनी त्याला बेड्या ठोकल्या. सीसीटीव्ही फुटेज, जीआरपी यांच्या मदतीने पोलिसांनी आरोपी ज्या ठिकाणी लपला होता, त्याची माहिती मिळवली.

पोलिसांनी दिलेल्या माहितीनुसार, १ ऑक्टोबर रोजी संध्याकाळच्या सुमारास यशवंत तावडे रोड, आजम डेअरीजवळ आरोपीने एका महिलेला १० ग्रॅम वजनाचे सोन्याचे चेन हिसकावले होते. त्यानंतर पोलिसांनी तांत्रिक तपास आणि सीसीटीव्ही फुटेजच्या आधारे आरोपीचा मागोवा घेतला. तपासात आरोपी ट्रेनने बिहारला पळून जात असल्याचे स्पष्ट झाले.

दहिसर पोलिसांनी जीआरपीच्या मदतीने मध्यप्रदेशातील बुरहानपूर येथून आरोपीला अटक केली. त्याच्याकडून चोरलेले सोन्याचे चेनही जप्त करण्यात आले आहे. आरोपीविरुद्ध मुंबईतील विविध पोलिस ठाण्यांमध्ये चेन स्नॅचिंगचे तीन गुन्हे आधीच नोंद आहेत. पोलिस आता त्याने आणखी कुठे-कुठे अशा प्रकारच्या चोरीच्या घटना केल्या आहेत का, याचा तपास करत आहेत.