उल्हासनगरमधून एक धक्कादायक बातमी समोर येत आहे. काँग्रेसच्या माजी नगरसेवकावर हल्ल्याचा प्रयत्न झाला आहे. अंमली पदार्थ विक्रेत्याला हटकल्यामुळे शाब्दिक वाद झाला. यामुळे माजी नगरसेवकावर हल्ला करण्यात आला. या हल्ल्यात ते थोडक्यात बचावले. या प्रकरणी आरोपीविरोधात गुन्हा दाखल करण्यात आला असून, पुढील तपास पोलिसांकडून सुरू आहे.

तुलसी वसीटा (वय वर्ष ७०) असे काँग्रेसच्या माजी नगरसेवकाचे नाव आहे. वसीटा उल्हासनगर कॅम्प 4 मधील श्रीराम चौकाजवळील वसीटा कॉलनीतील रहिवासी आहेत. तर, अजय बागुल असे आरोपीचे नाव आहे. मिळालेल्या माहितीनुसार, अजय बागुल हा अंमली पदार्थ विक्रेता आहे. आरोपी बागुल या परिसरात नशेचे पदार्थ विकण्यासाठी येत असतो.

मंगळवारीही तो अंमली पदार्थ विकण्यासाठी आला होता. वसीटा यांनी आरोपी बागुलला हटकले. यावेळी त्यांच्यात शाब्दिक बाचाबाची झाली. बागुलनं कंबरेला असलेला धारदार कोयता काढला. तसेच आरोपीनं वसीटा यांनी आरोपीवर वार करण्याचा प्रयत्न केला. या हल्ल्यात वसीटा थोडक्यात बचावले.

या प्रकरणनंतर वसीटा यांनी तातडीनं विठ्ठलवाडी पोलीस ठाण्यात धाव घेतली. तसेच अजय बागुल विरोधात तक्रार दाखल केली. तक्रारीनुसार, पोलिांसानी आरोपी बागुल विरोधात जीवेठार मारण्याचा प्रयत्न, शिवीगाळ आणि धमकावणे या गुन्ह्यांखाली गुन्हा दाखल करण्यात आला आहे. पुढील तपास पोलीस करत आहेत. दरम्यान, या घटनेनंतर परिसरात खळबळ उडाली आहे.