सुरज सावंत

मुंबई : मुंबई पोलिसांच्या मेघवाडी विभागाच्या निलंबित सहाय्यक आयुक्त सुजाता पाटील (Sujata Patil) यांनी सोशल मिडियावर काही पोस्टकरून एकच खळबळ उडवून दिली आहे. आपल्या व आपल्या कुटुंबियांवर काही अधिकारी पदाचा दुरउपयोग करून अत्याचार करत असून न्याय मिळणार नसेल तर आम्हाला गोळ्या घाला अशी कमेंट केली आहे.

या पूर्वी सुजाता पाटील यांच्यावर निलंबनाची कारवाई करण्यात आली त्यावेळी त्या़नी आत्मदहनाचा इशारा दिला होता. राज्याचे महासंचालक संजय पांडे (Sanjay Pandey) यांना पत्र लिहून आपल्याला न्याय मिळाला नाही, तर राज्यपाल कार्यालय, मातोश्री, मंत्रालय किंवा पोलिस मुख्यालयासमोर आत्मदहन करणार असा इशारा दिला होता.

लाचखोरी प्रकरणात लाचलुचपत प्रतिबंधक विभागाने लाच घेताना अटक;

काही दिवसांपूर्वी सुजाता पाटील यांना लाचलुचपत प्रतिबंध विभागानं 40 हजारांची लाच घेताना रंगेहाथ पकडलं होतं. पण हे सर्व पूर्वनियोजित असल्याचा दावा त्यांनी पोलिस महासंचालक संजय पांडे यांना लिहिलेल्या पत्रात केला होता. आपल्यावर आरोप केल्यानंतर पोलिसांनी घरी येऊन त्यांच्या परिवाराचा मानसिक छळ केल्याचा आरोपही त्यांनी या पत्रात केला होता. आपल्या परिवाराला पोलिसांनी मारहाण केल्याचं, मुलीचा विनयभंग केल्याचे आरोप आता फेसबुक पोस्टमधून पाटील या करत आहे. तसंच आपल्या विरोधातले सर्व दस्तावेज हे खोटं बनवण्यात आल्याचंही त्यांंचं म्हणणं आहे. वरिष्ठांच्या विरोधात गेल्यानं सूडबुद्धीनं कारवाई केल्याचा आरोप सुजाता पाटील यांनी केला आहे.

काही तासांपूर्वी सुजाता पाटील यांनी केलेल्या या पोस्ट सध्या सोशल मिडियावर चर्चेचा विषय ठरत आहेत.