पुणे: पुण्यातील कृषी महाविद्यालयात उपमुख्यमंत्री अजित पवार (Ajit Pawar) यांच्या हस्ते देशी गोवंश पशू प्रदर्शनाचे उद्घाटन करण्यात आले. हे प्रदर्शन २७ मे ते २९ मे दरम्यान सुरू असणार आहे. या प्रदर्शनाचे उद्घाटन झाल्यावर प्रदर्शनातील काही त्रुटी पाहून अजित पवार यांनी अधिकाऱ्यांना आपल्या खास शैलीत झापलं आहे. यावेळी त्यांनी कृषी अधिकाऱ्यांना काही प्रश्न विचारले असता त्यांना त्याची व्यवस्थित उत्तर देता ना आल्याने अजित पवार यांनी त्या अधिकाऱ्यांनाही "जरा बारामतीत (Baramati) या आणि काम कसं चालतंय ते बघा एकदा" असं म्हणत खडेबोल सुनावले आहे. (Ajit Pawar Visit In Govansh Exhibition in pune)

हे देखील पाहा -

अधिकाऱ्यांना हिसका

उपमुख्यमंत्री अजित पवार कृषी अधिकाऱ्यांना म्हणाले की, मी वेळेला महत्व देतो. मला ७:३० सांगितलं मी ७:२५ ला आलो. सांगितलं असतं तर आणखी लवकर आलो असतो. नीट पाहता आलं असतं. नुसतं वर-वर पहायला मला आवडत नाही. जे जसं आहे त्याबद्दल स्पष्ट बोललं पाहीजे. बंगळूरवरुन मी आणि राजेंद्र पवारांनी गायी आणल्या होत्या. एका ट्रक मध्ये ८ गायी. संध्याकाळी थांबायचं धारा काढायच्या असं करत आणल्या. गायींच्या प्रोडक्टना अनन्यसाधारण महत्व आलं आहे. आरोग्यासाठी चांगलं हे लोकांना कळलं आहे असं अजित पवार म्हणाले.

गोवंशावर राजकारण नको

पुढे ते म्हणाले की, “मी दुधाचा व्यवसाय केला आहे. गायींची खरेदी- विक्री करायला आम्ही जायचो. गाडीत गाय घेऊन जायचो. वेळ झाला की विहीर बघून गायीला पाणी पाजणं, चारा घालणं हे काम आम्ही केलं आहे. त्यामुळे यातले बारकावे आम्हाला माहित आहेत. शेतकरी गोवंशाबद्दल हळवा असतो आणि कृतज्ञदेखील असतो. गोवंश राजकारणाचा विषय ठरु नये अशी अपेक्षा व्यक्त करत काही जणं त्याला वेगळं वळण देत असतात, राजकारण करायचा प्रयत्न करतात असं अजित पवार म्हणाले आहे.

विद्यार्थीनीसमोर जोडले हात

देशी गोवंश पशू प्रदर्शनाच्या वेळी त्यांनी काही विद्यार्थिनींसोबत संवाद साधला. यावेळी एका विद्यार्थीनीला अजित पवारांनी विचारले, तुम्ही राहता कुठे? यावर विद्यार्थीनीने सांगितले मी टेंभूर्नी, सोलापूर. तुम्हाला मेरिटवर अॅडमिशन मिळालं का? किती टक्के मिळाले? त्यानंतर त्या विद्यार्थीनीने म्हटलं, हो मेरिटवर मिळालं. ९९.१० % हे ऐकताच उपमुख्यमंत्री अजित पवार यांनी त्या विद्यार्थनीसमोर हसत-हसत हात जोडले आणि म्हटले की, इथल्या विद्यार्थ्यांचे मार्क्स पाहून डोळेच पांढरे झाले, आमचे दोन वर्षांचे मिळून ही एवढे मार्क झाले नसते. पण कौतुक आहे तुमचं असंही अजित पवार म्हणाले आहेत.

रेड कार्पेटवरुन अधिकाऱ्यांची घेतली शाळा

या प्रदर्शनच्या वेळी जमिनीवर टाकण्यात आलेल्या रेड कार्पेटवरुनही त्यांनी अधिकाऱ्यांची शाळा घेतली आहे. ते म्हणाले की जमिनीची लेव्हल नीट झाली नाही. कार्पेट टाकलं पण, रानात चालल्यासारखं वाटलं. चेहरा चांगला दिसावा म्हणून मेकअप करायचा आणि मेकअप काढला की खरं रुप दिसतं असं म्हणत त्यांनी अधिकाऱ्यांच्या नियोजनावर नाराजी व्यक्त केली आहे.

Edited By - Akshay Baisane