मुंबई - शिवसेना (Shivsena) आणि शिंदे गटातील धुसफूस आता चांगलीच वाढू लागली आहे. खरी शिवसेना कुणाची यावरुन शिंदे गट विरुद्ध ठाकरे गट असा संघर्ष राज्यात सुरु आहे. आता तर हा वाद टोकाला गेल्याचं दिसून येतं आहे. मुंबईच्या प्रभादेवीत परिसरात शिंदे गट आणि ठाकरे गटात राडा झाला. अखेर जमावाला पांगवण्यासाठी पोलिसांनी सौम्य लाठीचार्जही केल्याची माहिती समोर आली आहे.

हा वाद मध्यरात्री १२.३० वाजताच्या सुमारास घडल्याची माहिती समोर येत आहे. दोन्ही गटात जोरदार हाणामारी झाली. दादर पोलीस स्टेशन परिसरातही दोन्ही गट आमनेसामने आले होते. यावेळी शिंदे गटात असलेले आमदार सदा सरवणकर यांनी पोलीस स्टेशनच्या आवारात गोळीबार केल्याचा देखील आरोप आहे. मात्र, सदा सरवणकर यांनी सर्व आरोप फेटाळून लावलेत. एका घरगुती प्रकरणाचा वाद झाल्याचं सरवणकर यांनी सांगितलं आहे.

यामध्ये विभागप्रमुख महेश सावंत थोडक्यात बचावले असल्याचा दावा शिवसेनेने केला. मात्र, सरवणकर यांनी हे आरोप फेटाळून लावले आहेत. पोलीस चौकशीनंतर सरवणकर पहाटे चार वाजण्याच्या सुमारास पोलीस स्टेशनमधून बाहेर पडले. या संपूर्ण घटनेमुळे प्रभादेवी परिसरात तणावाचे वातावरण निर्माण झाले आहे.

दरम्यान, या प्रकरणी आता 25 शिवसैनिकांवर गुन्हा दाखल करण्यात आला आहे. शिंदे गटातील संतोष तेलवणे यांच्या फिर्यादीवरून गुन्हा दाखल करण्यात आला आहे. महेश सावंत, शैलेश माळी, संजय भगत यांच्यासह 20 ते 25 जनांवर गुन्हा दाखल.