मुंबई : अधिवेशनाच्या दुसऱ्या दिवशी आज शिंदे-फडणवीस (Devendra Fadnavis) सरकारची बहुमत चाचणी पार पडली. या चाचणीत सरकारने आपलं बहुमत सिद्ध केलं. दरम्यान, बहुमत चाचणीनंतर मुख्यमंत्री एकनाथ शिंदे (Eknath Shinde) यांनी विधानसभेत भाषण केलं. यावेळी 'लढून शहीद झालो तरी चालेल, पण आता माघार घेणार नाही', असा इशारा त्यांनी विरोधकांना दिला. (Eknath Shinde Latest News)

एकनाथ शिंदे म्हणाले, “स्वत:चं मंत्रीपद दावावर लावून मी 50 आमदारांना घेऊन, समोर बसलेल्या बलाढ्य सरकारविरोधात बंड पुकारले. समोर सत्ता, यंत्रणा, एवढी मोठी माणसं होती. दुसरीकडे बाळासाहेबांचा आणि दिघे साहेबांचा सैनिक. मला अभिमान आहे या ५० लोकांचा. आपण हे मिशन सुरु केलं तेव्हा कोणी विचारलं नाही. कुठे चाललोय, कधी चाललोय, किती वेळ लागणार कोणी विचारलं नाही.”

'सुनिल प्रभु यांना माहिती आहे, माझं कशाप्रकारे खच्चीकरण झालं. शिवसेना वाचवण्यासाठी मी शहीद झालो, तरी चालेल पण आता मी मागे हटणार नाही. असं मुख्यमंत्री एकनाथ शिंदे म्हणालेत. 'मी मतदानाच्या दिवशी निघून आलो तेव्हा डिस्टर्ब होतो. मला बाळासाहेबांनी सांगितलेलं आठवलं की अन्यायाविरोधात बंड पुकारलं पाहिजे. आम्हाला अनेक फोन आले. पण मला एकही आमदार आपण मुख्यमंत्र्यांना भेटून पुढे जाऊयात असं म्हणाला नाही. हा विश्वास आहे', असंही मुख्यमंत्री म्हणालेत. (CM Eknath Shinde Live)

पुढे बोलताना मुख्यमंत्री एकनाथ शिंदे म्हणाले की, 'एका बाजुला महान नेते होते, सरकार होते, यंत्रणा होती आणि दुसरीकडे माझ्यासारखा एक साधा शिवसैनिक होता. पण माझ्या भरोशावर चाळीस आमदारांनी सगळं पणाला लावलं. या सगळ्यांचा मला अभिमान आहे. मी या सगळ्यांना सांगितलंय की पुढं काय व्हायचं ते होवो, तुमचं नुकसान होतंय असं वाटलं तर मी तुमचं नुकसान होऊ देणार नाही. तर मी जगाचा निरोप घेऊन निघून जाईन', असं एकनाथ शिंदे यांनी म्हटलं आहे.

Edited By - Satish Daud