मुंबईच्या मानखुर्द परिसरातून एक धक्कादायक घटना समोर आली आहे. रस्त्यावर तयार होणार चिकन शोरमा खाल्ल्याने अनेकांना विषबाधा झाली आहे. यामध्ये १९ वर्षीय तरुणाचा मृत्यू झाला आहे. या प्रकरणी मानखुर्द पोलिसांनी शोरमा विक्रेत्याविरोधात सदोष मनुष्यवधाचा गुन्हा दाखल केला आहे.

प्रथमेश भोकसे (वय १९) असं मृत तरुणाचे नाव आहे. विषबाधा झालेल्या इतर व्यक्तींवर रुग्णालयात उपचार सुरू आहेत. या घटनेनं परिसरात मोठी खळबळ उडाली आहे. मिळालेल्या माहितीनुसार, मानखुर्दच्या महाराष्ट्रनगरमध्ये शोरमा विक्रीच्या गाडीवरून प्रथमेशसह परिसरातील अनेक नागरिकांनी चिकन शोरमा खाल्ला होता.

शोरमा खाताच त्यांना मोठ्या प्रमाणात उलटी आणि पोटदुखीचा त्रास होऊ लागला. त्यामुळे अनेकांनी रुग्णालयात धाव घेतली. यात प्रथमेश याचा देखील समावेश होता. पोटदुखीचा त्रास होऊ लागल्याने प्रथमेशला केईएम रुग्णालयात उपचारासाठी दाखल करण्यात आलं होतं.

मात्र, उपचार सुरू असताना त्याची प्रकृती आणखीच खालावली. त्यामुळे प्रथमेशचा मृत्यू झाला. सध्या इतर १० ते १२ जणांवर वेगवेगळ्या रुग्णालयात उपचार सुरू आहेत. या प्रकरणी मानखुर्द पोलिसांनी शोरमा विक्रेत्याविरोधात सदोष मनुष्यवधाचा गुन्हा दाखल केला असून त्याला अटकही केली आहे.

शोरमातील चिकन खराब असल्याचा पोलिसांना संशय आहे. काही दिवसांपूर्वी चिकन शोरमा खाऊन गोरेगावमधील १२ जणांना विषबाधा झाल्याची धक्कादायक घटना घडली होती. गोरेगाव पूर्वेकडील संतोषनगरमध्ये ही घटना घडली आहे. विषबाधा झालेल्या सर्व जणांना रुग्णालयात दाखल करण्यात आलं होतं.