Summary -

• मध्य रेल्वे मार्गावरील लोकलसेवा विस्कळीत

• डोंबिवलीजवळ लोकलचे ३ डबे रुळावरून घसरले

• लोकल रिकामी असल्यामुळे मोठी दुर्घटना टळली

• आठवड्याच्या पहिल्याच दिवशी लोकलसेवा विस्कळीत झाल्याने प्रवाशांचे हाल

मयूर राणे, मुंबई

ऐन गर्दीच्या वेळी मध्य रेल्वेची वाहतूक विस्कळीत झाली आहे. डोंबिवली रेल्वे स्थनकाजवळ लोकलचे ३ डबे रुळावरून घसरले. ही लोकल कळवा कारशेडमधून अंबरनाथ रेल्वे स्थानकाच्या दिशेने जात होती. लोकल रिकामी असल्यामुळे सुदैवाने कोणतीही अनुचित घटना घडली नाही. पण या घटनेमुळे मध्य रेल्वेची वाहतूक विस्कळीत झाली आहे. दोन्ही मार्गावरील लोकलसेवा उशिराने सुरू आहेत. त्यामुळे प्रवाशांचे हाल होत आहे.

आज सकाळी ८.३० वाजताच्या सुमारास डोंबिवली रेल्वे स्थानकाजवळ लोकलचे ३ डबे रुळावरून घसरल्याची माहिती रेल्वेच्या मुख्य जनसंपर्क अधिकाऱ्यांनी दिली आहे. ट्रेनमध्ये प्रवासी नसल्यामुळे मोठी दुर्घटना टळली. ही लोकल कारशेडमधून अंबरनाथच्या दिशेने जात होती. या घटनेमुळे मध्य रेल्वेची अप आणि डाऊन या दोन्ही मार्गावरील लोकलसेवा विस्कळीत झाली आहे. त्यामुळे मध्य रेल्वेच्या सर्वच रेल्वे स्थानकावर प्रवाशांची गर्दी झाली आहे.

आठवड्याच्या पहिल्याच दिवशी मध्य रेल्वेची वाहतूक विस्कळीत झाल्यामुळे प्रवाशांचे हाल होत आहे. मुंबईच्या दिशेला कामाला निघालेल्या प्रवाशांचे चांगलेच हाल होत आहे. ऑफिसला जाण्यासाठी उशिर होत आहे त्यामुळे आज त्यांना लेटमार्क लागण्याची शक्यता आहे. घटनेची माहिती मिळताच रेल्वे कर्मचाऱ्यांनी घटनास्थळी धाव घेतली असून लोकलसेवा सुरळीत करण्याचे प्रयत्न युद्धपातळीवर सुरू आहेत.