मुंबई शहराची जीवनवाहिनी म्हणजे लोकल ट्रेन. मुंबईत फिरायचं म्हटलं तर सामान्य प्रवासी लोकलनेच प्रवास करतात. लोकल ट्रेनने प्रवास करण्याआधी तिकीट काढणं अनिवार्य आहे. जसं जसा काळ बदलत गेला, तस तसं तिकीट काढण्याच्या पद्धतीमध्ये देखील बदलाव येत गेला. मात्र, अजूनही असेही काही प्रवासी आहेत, जे रांगेत उभे राहून तिकीट काढतात. या समस्येवर तोडगा काढण्यासाठी मध्य रेल्वेने एक नवीन सुविधा प्रवाशांसाठी उपलब्ध करून दिली आहे. आता आपण 'एम-यूटीएस सहाय्यक' यांच्या मदतीने तिकीट काढू शकता.

प्रवाशांसाठी नेमकी नवी सुविधा कोणती?

लोकल पकडण्याची प्रत्येकाला घाई असते. त्यामुळे रांगेत उभं राहून तिकीट काढताना बराच वेळ जातो. यासाठी लोकल ट्रेनचे तिकीट काढणे आणखी सोपे व्हावे, यासाठी एटीव्हीएम, यूटीएस प्रणाली आणि यूटीएस सेवेनंतर आता 'मोबाईल यूटीएस सहाय्यक' ही नवी सुविधा सुरू करण्यात आली आहे. ही सेवा सर्वात आधी छत्रपती शिवाजी महाराज टर्मिनस येथे ३१ ऑक्टोबरपासून सुरू करण्यात आली आहे.

याचा फायदा प्रवाशांना नेमका कसा होणार?

'मोबाईल यूटीएस सहाय्यक' या नव्या सुविधेमुळे १३ दिवसांत तब्बल २०.३३ लाख रूपयांचा महसूल मिळाला आहे. तिकीट काढण्यासाठी रांगेत उभ्या असलेल्या प्रवाशांना मदत करण्यासाठी तिथे विशेष प्रशिक्षित अशी ३ 'मोबाईल यूटीएस सहाय्यक' व्यक्ती तिकीट प्लॅटफॉर्मवर तैनात असतात. हे सहाय्यक प्रवाशांकडून तिकीटाची माहिती आणि पैसे घेतात. तसेच तिकीट प्रिंट करून देतात. यामुळे प्रवाशांच्या वेळेची बचत होते.

मोबाईल यूटीएस सहाय्यक कसे काम करते?

'मोबाईल यूटीएस सहाय्यक' सोबत मोबाईल फोन आणि लहान तिकीट प्रिंटिंद मशीन घेऊन असतात. उभ्या असलेल्या प्रवाशांकडे ते थेट जातात. त्यांना त्वरीत तिकीट काढून देतात. डिजिटल पेमेंट किंवा रोख रक्कम देऊन तिकीट काढण्याची सुविधा आहे. यामुळे ही प्रक्रिया अधिक वेगवान आणि सोयीस्कर होईल.