Mumbai News: कॉपी करताना शिक्षकाने पकडले त्यामुळे नैराशेत येऊन एका विद्यार्थिनीने आत्महत्या (Student End Her Life) केल्याची धक्कादायक घटना समोर आली आहे. मुंबईच्या (Mumbai) चेंबूर (Chembur News) परिसरात ही घटना घडली आहे. याप्रकरणी चेंबूर पोलिस (Chembur Police) ठाण्यात अपमृत्यूची नोंद करण्यात आली आहे. या घटनेमुळे एकच खळबळ उडाली आहे.

मिळालेल्या माहितीनुसार, चेंबूरमध्ये राहणाऱ्या एका 16 वर्षांच्या मुलीने आत्महत्या केली. ही मुलगी नववीमध्ये शिकत होती. तिच्या शाळेमध्ये सध्या परीक्षा सुरु आहे. परीक्षेवेळी या मुलीला शिक्षकाने कॉपी करताना पकडले. या शिक्षकाने मुलीच्या आईला याची माहिती दिली. यातून नैराशेत आलेल्या मुलीने टोकाचे पाऊल उचलत आयुष्य संपवले. तिच्या या टोकाच्या निर्णयामुळे कुटुंबियांना मोठा धक्का बसला.

शिक्षकाने पेपरला कॉपी करत असल्याची बाब आईला सांगितल्यामुळे मुलीला खूप वाईट वाटले. तिने पेपरवरुन घरी आल्यानंतर गळफास लावून आत्महत्या केली. या घटनेची माहिती मिळताच चेंबूर पोलिसांनी घटनास्थळी धाव घेतली. मुलीचा मृतदेह ताब्यात घेत त्यांनी शवविच्छेदनासाठी रुग्णालयात पाठवला. या प्रकरणी चेंबूर पोलिसांनी अपमृत्यूची नोंद केली आहे.