Ulhasnagar Crime News : उल्हासनगर (Ulhasnagar Latest News) येथे ठाकरे गटाच्या महिलांनी मटक्याच्या अड्ड्याची तोडफोड केल्याचा प्रकार घडला होता. याप्रकरणी ठाकरे गटाच्या महिला कार्यकर्त्यांवर गुन्हा दाखल करण्यात आला आहे. मटक्याचा अड्डा सुरू नसतानाही केवळ राजकीय स्टंटबाजीसाठी हे आंदोलन (aandolan) करण्यात आल्याचा आरोप महिलांवर करण्यात आला आहे. (Maharashtra News)

उल्हासनगरच्या कॅम्प ५ मधील जय जनता कॉलनीत एका गाळ्यात जुगार अड्डा सुरू असल्याचा आरोप करत ठाकरे गटाच्या महिला कार्यकर्त्यांनी २१ मार्च रोजी तोडफोड केली होती. कैलास तेजी आणि जया तेजी यांच्यासह जवळपास २५ ते ३० महिलांनी ही तोडफोड केली होती. याप्रकरणी हिललाईन पोलिसांनी या सर्वांच्या विरोधात गुन्हा दाखल केला आहे.

गाळ्यात जुगाराचा अड्डा सुरू नसतानाही केवळ राजकीय स्टंटबाजी करण्यासाठी ही तोडफोड करण्यात आल्याचा आरोप या सर्वांवर ठेवण्यात आला आहे. मात्र त्यांच्यावर लावण्यात आलेले कलम हे जामीनपात्र असल्यानं त्यांना अटक न करता फक्त नोटीस बजावण्यात आल्याची माहिती पोपट कराडकर (पोलीस निरीक्षक) यांनी दिली.

दरम्यान, या महिलांनी तोडफोड करताना चित्रित केलेल्या व्हिडिओत जुगार खेळण्यासाठी लागणारं साहित्य आणि तसे स्टिकर्स असलेले टेबल दिसत आहे. त्यामुळं पोलिसांच्या या कारवाईवरही साशंकता व्यक्त होत आहे.

Edited By : Siddharth Latkar