मुंब्रा रेल्वे स्थानकाजवळ झालेल्या रेल्वे अपघातामध्ये ४ प्रवाशांचा दुर्दैवी मृत्यू झाला. तर ९ प्रवासी जखमी झाले. जखमी प्रवाशांमध्ये अनेकांची प्रकृती गंभीर आहे. या अपघातामध्ये मुंब्रामध्ये राहणारा राहुल गुप्ता या तरुणाचा दुर्दैवी मृत्यू झाला. राहुल घरात एकुलता एक कमावता व्यक्ती होता. त्याच्या मृत्यची बातमी कळताच कुटुंबीयांच्या पायाखालची जमीन सरकली. राहुल बहिणीच्या लग्नासाठी पैसे जमा करण्यासाठी प्रचंड मेहनत करत होता.

राहुल गुप्ता हा तरुण २८ वर्षांचा होता. राहुल हा दिवा येथील साबेगाव यशोदानगर येथे चाळीत राहत होता. चार जणांच्या कुटुंबामध्ये तो एकटा कमवणारा होता. राहुल मुंबईतील एका स्टेशनरीच्या दुकानामध्ये काम करत होता. राहुल सोमवारी सकाळी नेहमीप्रमाणे कामाला जाण्यासाठी निघाला. नेहमीच्या लोकलमध्ये तो चढला खरा पण गर्दी असल्यामुळे तो लोकलच्या दारात उभा राहूनच प्रवास करत होता. तेवढ्यात लोकलला अपघात झाला आणि राहुलचा हात सुटून तो रेल्वे रूळावर पडला. या अपघातामध्ये गंभीर जखमी झालेल्या राहुलचा मृत्यू झाला.

राहुलच्या मृत्यूचे वृत्त कळताच त्याच्या कुटुंबाला आणि मित्रांना मोठा धक्का बसला. रडून रडून त्यांचे बेहाल झाले आहे. राहुलच्या घरात त्याचे आई-वडील, दोन लहान बहिणी आहेत. राहुलला त्याच्या बहिणीचे लग्न करायचे होते. यासाठीच तो प्रचंड मेहनत घेत होता. घरात राहुल एकटाच कमावत होता. त्यामुळे राहुलच्या कुटुंबीयांना सरकारने आर्थिक मदत द्यावी, अशी मागणी त्याच्या मित्रांनी केली आहे.

दरम्यान, आज सकाळी मुंब्रा रेल्वे स्थानकाजवळील वळणावर विरुद्ध दिशेला जाणाऱ्या दोन लोकल एकाच वेळी जवळ आल्या. त्यामुळे लोकलमधील काही प्रवाशांच्या बॅगा दुसऱ्या लोकलला घासल्या गेल्या. यावेळी धावत्या लोकलमधून अनेक प्रवासी रेल्वे रूळावर पडले. या अपघातामध्ये फक्त पुरूषच नाही तर महिला देखील जखमी झाल्या. कुणाच्या डोक्याला गंभीर दुखापत झाली तर कुणाचा हात तर कुणाचा पाय तुटला. या सर्व जखमींवर सध्या कळव्यातील सरकारी रुग्णलाय आणि ठाण्यातील ज्युपिटर रुग्णालयात उपचार सूरू आहेत.