पुणे: पुण्यामध्ये चक्क एक परीक्षा केंद्रच गायब झालय. टिळक रस्त्यावर एका इमारतीमध्ये राव जूनियर कॉलेज आहे. याठिकाणी बारावीच परीक्षा केंद्र आहे. प्रत्यक्षात जाऊन बघितलं असता तिथं परीक्षा केंद्राचा (Exam Center) काहीच ठावठिकाणा नाहीए. विशेष म्हणजे बोर्डाच्या वेबसाईटवर याच पत्त्याची नोंद आहे. महाराष्ट्र नवनिर्माण विद्यार्थी सेनेच्या (MNS) कार्यकर्त्यांनी ही बाब निदर्शनास आणून दिली, तेव्हा पुलगेट येथील सोलापूर बाजार परिसरातील एका खासगी क्लासमध्ये ही बारावीची परीक्षा (12th Board Exam) घेतली जात असल्याचं समोर आलं आहे. (Board's examination center in private class in Pune; Education department's mismanagement)

हे देखील पहा -

धक्कादायक बाब म्हणजे शिक्षण मंडळाला याचा मागमूसही नाही. याबाबत प्रश्न विचारले असता या तथाकथित परीक्षा केंद्राच्या पर्यवेक्षिकेने अक्षरशः थातुर मातुर उत्तरं देत बाजू सावरण्याचा प्रयत्न केला. एकूणच परीक्षेतील गैरप्रकारांना प्रोत्साहन देणारा हा प्रकार असल्याचा संशय येतो. यासंदर्भात विभागीय शिक्षण मंडळ (Education Department) आणि शिक्षण उपसंचालक कार्यालयामार्फत चौकशी करण्यात येणार आहे. आज त्या केंद्रावर पेपर सुरू नव्हता. मात्र ज्या दिवशी पेपर असेल त्या दिवशी शिक्षण विभागाचे अधिकारी प्रत्यक्ष जाऊन पडताळणी करणार आहेत.

Edited By - Akshay Baisane