पुण्याच्या कोथरूड परिसरातील एका सलूनमध्ये वादग्रस्त प्रकार घडला आहे. या घटनेत भाजप महिला मोर्चाच्या कार्यकर्त्यांनी एका सलून चालकाला मारहाण केल्याचा आरोप समोर आला आहे. आरोप आहे की, संबंधित सलूनमध्ये काम करणाऱ्या एका तरुणीचे सलून चालकाकडून धर्मांतर करण्याचा प्रयत्न होत होता.

या आरोपाच्या पार्श्वभूमीवर भाजप महिला मोर्चाच्या उज्वला गौड यांच्या नेतृत्वाखाली काही कार्यकर्त्यांनी सलूनमध्ये धडक दिली आणि सलून चालकाला बेदम चोप दिला. मात्र, पोलिसांनी दिलेलेल्या प्राथमिक माहितीनुसार, या संपूर्ण घटनेमागे धार्मिक वाद नसून आर्थिक कारणे असल्याचे स्पष्ट झाले आहे. पोलिसांच्या तपासात समोर आले आहे की, संबंधित तरुणीने सलूनमध्ये काम सुरू करताना अँडव्हान्स स्वरूपात काही पैसे घेतले होते. नंतर तिने नोकरी सोडण्याचा निर्णय घेतला.

मात्र तिने घेतलेले पैसे परत न करता थेट निघून जाण्याचा प्रयत्न केला. यामुळे सलून चालकाने तिच्यावर राग काढत तिला शिवीगाळ केली. याच घटनेनंतर वाद उफाळून आला आणि राजकीय हस्तक्षेप झाल्याने प्रकरणाला वेगळे वळण लागले. पोलिसांनी घटनेचा तपास सुरू केला असून सर्व बाजू तपासल्या जात आहेत.

सोशल मीडियावर या घटनेचा व्हिडिओही व्हायरल झाला असून, त्यात महिलांचा गोंधळ आणि सलून चालकावर करण्यात आलेली मारहाण स्पष्टपणे दिसून येते. पोलिसांनी या प्रकरणी सर्व संबंधित व्यक्तींचे जबाब नोंदवण्यास सुरुवात केली असून, नेमकी कायदेशीर कारवाई काय केली जाईल, हे तपासानंतर स्पष्ट होणार आहे.