मावळ, ता. ३ ऑगस्ट २०२४

राज्यात विधानसभा निवडणुकांचे वारे वाहू लागताच दावे- प्रतिदावे अन् कुरघोड्यांना ऊत आला आहे. विधानसभेचे जागा वाटप अन् चर्चा होण्याआधी महायुतीमध्ये बंडाचा झेंडा फडकला आहे. भारतीय जनता पक्षाचे नेते आणि माजी राज्यमंत्री बाळा भेगडे यांनी मावळ विधानसभेवर दावा करत राष्ट्रवादी अजित पवार गटाचे आमदार सुनिल शेळके यांच्याविरोधात दंड थोपटले आहेत.

मावळमध्ये बंडखोरीचे संकेत

मावळ विधानसभेवरुन भाजप आणि राष्ट्रवादी अजित पवार गटामध्ये वाद पेटला आहे. मावळ विधानसभा हा भाजपचाच बालेकिल्ला आहे, असे म्हणत बाळा भेगडे यांनी सुनिल शेळकेंना आव्हान दिले आहे. सांगली लोकसभेचा दाखला देत बाळा भेगडे यांनी बंडखोरीचे स्पष्ट संकेत दिले आहेत. काल मावळ विधानसभा मतदार संघात भाजप कार्यकर्त्यांचा मेळावा घेत बाळा भेगडे यांनी जोरदार शक्तीप्रदर्शन केले. यावेळी ते बोलत होते.

बाळा भेगडेंचे सुनिल शेळकेंना आव्हान

"स्थानिक कार्यकर्त्यांच्या विरोधात जाऊन पक्षाने निर्णय घेतला तर काय होतं हे सांगलीकरांनी दाखवून दिलं. म्हणून महायुतीमध्ये मावळ हा भाजपचा बालेकिल्ला होता आणि पुढेही राहिलं. अभी नही तो कभी नही, हीच वेळ आहे. महाराष्ट्रामध्ये मावळच्या जनतेच्या आशिर्वादावर येणारी दिशा ठरवायची आहे," असं बाळा भेगडे यावेळी म्हणाले.

"ज्यांनी भाजपच्या पाठीत खंजिर खुपसला त्यांच्या कलेला उत्तर द्यायचं आता भारतीय जनता पक्षाने ठरवले आहे. माझं एकच सांगण आहे, गेल्या घरी सुखी राहा," असा टोला त्यांनी लगावला. तसेच राष्ट्रवादी काँग्रेसकडून मावळमध्ये सुनिल शेळकेंना उमेदवारी दिली तर प्रचार करायचा नाही, असा ठरावही यावेळी मंजूर करण्यात आला.