दुसरीकडे केडीएमसीमधील मनसेनं शिंदेसेनेशी केलेली युतीमुळे राज ठाकरेही व्यथित असल्याचा दावा राऊतांनी केलाय.. सत्तास्थापनेसाठी मनसेनं ठाकरेसेनेची साथ सोडून शिंदेंना साथ दिल्यानं भाजपच्या हाती आयतं कोलित मिळालंय.. पत्त्यांचा बंगलाही जास्त काळ टिकतो... त्यापेक्षा कमी काळात ठाकरे बंधूंची युती तुटल्याचा टोला भाजपनं लगावलाय.. एवढंच नाही शिंदेसेनेनं भाजपला शह दिल्याची चर्चा रंगल्यानंतर आता भाजपनंही अप्रत्यक्षपणे शिंदेसेनेला इशारा दिलाय.... शिंदेसेनेनंही खेळी करण्याचा प्रयत्न केला तर फडणवीसांची खेळी महाराष्ट्राला माहिती आहे, असं वक्तव्य प्रवीण दरेकरांनी केलंय...

खरं तर कल्याण डोंबिवली महापालिकेत भाजप आणि शिंदेसेनेनं स्वतंत्र निवडणूक लढवली होती... तर मनसे आणि ठाकरे सेनेनं एकीचा नारा दिला होता... मात्र निकालानंतर कल्याण डोंबिवलीकरांनी कोणत्याच पक्षाला स्पष्ट बहुमत दिलं नाही आणि सर्वच राजकीय पक्षांचं गणित बिघडलं. मात्र वर्चस्वाच्या या लढाईत शिंदेसेनेनं सत्तेचं समीकरण कसं जुळवलंय..पाहूयात...

कल्याण डोंबिवली महापालिकेत 122 जागा आहेत.. त्यामुळे बहुमतासाठी 62 जागांची आवश्यकता आहे. त्यात. शिंदेसेनेचे 53, ठाकरेसेनेचे 4 बंडखोर आणि मनसेच्या 5 नगरसेवकांसह शिंदेसेनेनं 62 जागांचा आकडा गाठलाय... तर भाजप 50, ठाकरेसेनेचे 7, काँग्रेसचे 2 आणि पवारांच्या राष्ट्रवादीचा 1 नगरसेवक विरोधात बसण्याची शक्यता आहे...

आता या समीकरणानुसार कल्याण डोंबिवलीत भाजपला बायपास करुन शिंदेसेनेनं केडीएमसीभोवतीची आपली तटबंदी भक्कम केली आहेत.. त्यामुळे शिंदेंसाठी मुंबई महापालिकेच्या महापौरपदासाठी दबावतंत्र वापरण्याचा मार्ग मोकळा झालाय.. त्यामुळे भाजपसाठी मुंबई महापालिकेतील सत्तास्थापनेचं गणित आणखीच कठीण झालंय.. हे मात्र निश्चित...