Summary -

• नवी मुंबईत भाजपला मोठा धक्का.

• भाजप, काँग्रेस पदाधिकाऱ्यांचा शिवसेना ठाकरे गटात प्रवेश.

• मातोश्रीवर उद्धव ठाकरे यांच्या उपस्थितीत पक्षप्रवेश सोहळा.

• महापालिका निवडणुकीपूर्वी ठाकरे गटाचे बळ वाढले.

नवी मुंबईमध्ये भाजपला मोठा धक्का बसला आहे. भाजप, काँग्रेसह इतर पक्षांचे अनेक पदाधिकारी आणि कार्यकर्त्यांनी मोठ्या संख्येने शिवसेना ठाकरे गटामध्ये प्रवेश केला. मातोश्रीवर शिवसेना ठाकरे गटाचे पक्षप्रमुख उद्धव ठाकरे यांच्या उपस्थितीमध्ये या सर्वांनी शिवबंधन हातामध्ये बांधलं. महापालिका निवडणुकीपूर्वी नवी मुंबईमध्ये हा भाजपसाठी मोठा धक्का असल्याचे म्हटले जात आहे.

मिळालेल्या माहितीनुसार, नवी मुंबईतल्या नेरुळ आणि बेलापूर येथील भाजप, काँग्रेस आणि इतर पक्षातील पदाधिकारी आणि कार्यकर्त्यांनी आज उध्दव ठाकरे यांच्या उपस्थितीत शिवसेना ठाकरे गटामध्ये प्रवेश केला. यावेळी उद्धव ठाकरे यांनी सर्वांचे पक्षामध्ये स्वागत करत त्यांच्या हातावर शिवबंधन बांधले. आगामी स्थानिक स्वराज्य संस्थांच्या निवडणुकीपूर्वी नवी मुंबईत शिवसेना ठाकरे गटाची ताकद चांगलीच वाढली आहे. यावेळी उद्धव ठाकरे यांनी या सर्वांना आगामी निवडणुकीमध्ये ताकदीने काम करण्याचे आवाहन केले.

यावेळी माध्यमांशी बोलताना उद्धव ठाकरे यांनी सांगितले की, 'एक नवी सुरूवात संपूर्ण देशात होत आहे. कालचा दिवस देशाच्या दृष्टीने आणि महाराष्ट्राच्या दृष्टीने खूप महत्वाचा होता. महाराष्ट्रात जे काही चालले आहे ते आपण सर्व पाहतोय आणि भोगत आहोत. भ्रष्टाचार ऐवढ्या उघडपणाने चालला आहे की महाराष्ट्रामध्ये बेबंदेशाहीच आहे. मुख्यमंत्र्यांबद्दल मी काल आज आणि उद्या देखील तेच म्हणेल. जोपर्यंत या भ्रष्टाचाऱ्यांवर कारवाई होत नाही तोपर्यंत मुख्यमंत्री असले तरी काय आणि नसले तरी काय कुणाला काहीच फरक पडत नाही.'