मंगेश कचरे, साम टीव्ही

बारामतीमध्ये उघडकीस आलेल्या एका धक्कादायक घटनेनेमोठी खळबळ उडाली आहे. दृश्यम चित्रपटालाही मागे टाकणाऱ्या या थरारक प्रकरणात एका महिलेने आपल्या पतीला ठार मारून घरातच जिवंत पुरण्याचा कट रचल्याचा आरोप आहे. मात्र डायल 112 वर आलेल्या एका फोनमुळे हा कट उधळला गेला आणि भरत फोर्जमध्ये काम करणाऱ्या कर्मचाऱ्याचा जीव वाचला. या प्रकरणी बारामती शहर पोलीस ठाण्यात गुन्हा क्रमांक ३१३/२०२६ अन्वये बीएनएस कलम १०९(१) अंतर्गत गुन्हा दाखल करण्यात आला आहे. फिर्यादी प्रकाश कान्होबा जगताप (७१) यांनी दिलेल्या तक्रारीवरून त्यांची सून शर्मिला प्रविण जगताप (३८) हिला आरोपी करण्यात आले आहे.

पोलिसांनी दिलेल्या माहितीनुसार, पीडित प्रवीण प्रकाश जगताप (वय 41) हे भरत फोर्जमध्ये कार्यरत आहेत. सुमारे दहा वर्षांपूर्वी त्यांचा विवाह झाला असून त्यांना दोन मुले आहेत. मात्र गेल्या काही दिवसांपासून पती-पत्नीमध्ये कौटुंबिक वाद सुरू असल्याचे तपासात समोर आली आहे.

दरम्यान, आरोपी महिलेने पतीला गुंगीचे औषध देऊन त्याच्यावर क्रिकेट बॅटने मारहाण केल्याचा आरोप आहे. त्यानंतर घरातच बांधलेल्या सिमेंटच्या कट्ट्यात त्याला पुरण्याचा प्रयत्न केल्याची धक्कादायक माहिती समोर आली आहे. मात्र, याचवेळी डायल ११२ वर आलेल्या एका अज्ञात फोनमुळे पोलिसांनी तात्काळ घटनास्थळी धाव घेतली आणि हा थरारक कट उधळण्यात यश मिळवले. पोलिसांच्या या वेळीच हस्तक्षेपामुळे पीडिताचा जीव वाचला.