मयुरेश कडवं, बदलापूर

राज्यातील २४६ नगरपरिषदा आणि ४२ नगरपंचायतीच्या निवडणुकांचा निकाल जाहीर होत असून सर्वत्र महायुतीचा दबदबा पाहायला मिळतो आहे. मात्र बदलापुरात भाजपने एकनाथ शिंदेंना मोठा धक्का दिला आहे. बदलापूर मतदारसंघ शिंदेंच्या शिवसेनेचा बालेकिल्ला मानला जातो. याठिकाणी भाजपच्या रुचिता घोरपडे ( Ruchita Ghorpade) ७ हजार ६३४ मतांनी विजयी झाल्या असून वीणा म्हात्रे यांचा पराभव झाला आहे. यामुळे बदलापूरमध्ये शिंदेंच्या शिवसेनेत नाराजी पाहायला मिळते आहे.

बदलापुरात शिवसेना आणि भाजपात जोरदार चुरस होती. मात्र मतमोजणीवेळी सुरुवातीपासूनच भाजपच्या नगराध्यक्ष पदाच्या उमेदवार रुचिता घोरपडे यांनी आघाडी घेतली. ही आघाडी शेवटपर्यंत कायम राखत भाजपने एकहाती विजयश्री खेचून आणली. रुचिता घोरपडे यांना ६४ हजार ६०४ मतं मिळाली तर मीना म्हात्रे यांना ५६ हजार ९७० मतं मिळाली.

नगराध्यक्षपदाच्या विजयासह भाजपने २३ जागा जिंकल्या आहेत तर शिवसेना २३ जागांवर विजयी झाली आहे. राष्ट्रवादीने तीन जागा मिळवल्या आहेत. बदलापूर हा शिवसेनेचा बालेकिल्ला मानला जातो. मात्र भाजपच्या विजयाने हा बालेकिल्ला उध्वस्त झाला आहे. पराभवानंतर बदलापूरमध्ये शिंदेंच्या कार्यकर्त्यांमध्ये नाराजी पाहायला मिळत आहे.