बदलापूर शहराला पर्यावरणपूरक आणि प्रदूषणमुक्त करण्यासाठी कुळगाव-बदलापूर नगरपरिषदेने एक ऐतिहासिक पाऊल उचलले आहे. हरित बदलापूर 2035 या महत्वाकांक्षी उपक्रमांतर्गत नगर परिषद आणि दापोलीच्या डॉ. बाळासाहेब सावंत कोकण कृषि विद्यापीठामध्ये एक महत्वपूर्ण सामंजस्य करार करण्यात आला आहे. या काराराअंतर्गत पुढील 10 वर्षांसाठी बदलापूर शहराचा वैज्ञानिक हरित विकास आराखडा तयार केला जाणार आहे.

या प्रकल्पाचा माध्यमातून शहरातील वृक्षांचे डिजिटल मपिंग करणे, ऑक्सीजन पार्क उभारणे, नागरी जंगले आणि जैवविविधता उद्याने विकसित करणे, तसेच जलस्रोतांचे हरीतीकरण अशा विविध पर्यावरणपूरक उपक्रमांची अंमलबजावणी केली जाणार आहे. या संपूर्ण प्रकल्पासाठी कोकण कृषि विद्यापीठाचे वैज्ञानिक आणि तांत्रिक मार्गदर्शन लाभणार असून, राज्य आणि केंद्र सरकारच्या विविध योजनांमधून यासाठी निधी उभारला जाणार आहे. हा प्रकल्प संपूर्ण राज्यातील नगरपरिषदांसाठी एक आदर्श पॅटर्न ठरेल, असा विश्वास नगराध्यक्षा रुचिता घोरपडे यांनी व्यक्त केला.

बदलापूर शहराचा कायापालट करण्यासाठी आणि नागरिकांना शुद्ध हवा मिळावी यासाठी हा १० वर्षांचा मास्टर प्लॅन तयार करण्यात आला आहे. या मोहिमेत केवळ प्रशासनच नाही, तर बदलापूरकर नागरिकांनीही सक्रिय सहभाग नोंदवावा आणि वृक्षसंवर्धनाची एक मोठी लोकचळवळ उभी करावी, असे आवाहन प्रशासनाच्या वतीने करण्यात आले आहे.