अभिजीत देशमुख, साम टीव्ही

बदलापूर : बदलापूर अत्याचार प्रकरणात संबंधित शाळेचे अध्यक्ष उदय कोतवाल आणि सचिव तुषार आपटे यांना आज गुरुवारी जामीन मिळाला. त्यानंतर काही वेळातच पोलिसांनी दुसऱ्या गुन्ह्यात पुन्हा अटक केली. जामीन मिळाल्यानंतर पोलिसांनी त्यांना पुन्हा कोर्टातूनच अटक केली. त्यामुळे आता या दोघांना तुरुंगातच मुक्काम करावा लागणार आहे.

बदलापूर अत्याचार प्रकरणात ,संबंधित शाळेचे अध्यक्ष उदय कोतवाल आणि सचिव तुषार आपटे यांना सहआरोपी करत त्यांच्यावर गुन्हा दाखल करण्यात आला होता. पोलिसांनी दीड महिन्यांनी या फरार सहआरोपींना कर्जतमधून अटक केली. त्यानंतर दुसऱ्या दिवशी या दोघांना कोर्टात हजर केलं होतं. अटक केलेल्या दोघांना कोर्टाने न्यायालयीन कोठडी सुनावली होती. त्यानंतर त्यांनी तातडीने जामिनासाठी अर्ज केला. कोर्टाने त्यांचा जामीन देखील मंजूर केला. मात्र, पोलिसांनी अपराध क्रमांक ३९१ नुसार त्यांना कोर्टातूनच अटक केली.

बदलापूर अत्याचार प्रकरणात दोन पीडित मुली होत्या. या प्रकरणी दोन एफआयर दाखल करण्यात आले होते. एका गुन्ह्यात तत्काळ जामीन मिळाला. त्यानंतर पोलिसांनी दुसऱ्या गुन्ह्यात अटक करण्याची परवानगी मागितली. त्यानुसार कोर्टाने परवानगी दिली. त्यानंतर त्या दोघांना पोलिसांनी कोर्टातूनच अटक केली. त्यामुळे या प्रकरणात ट्विस्टवर ट्विस्ट पाहायला मिळाले. आज दिवसभरात त्यांना एकाच वेळी जामीन मिळाला त्यानंतर पोलिसांनी लगेच अटक केली.

जामीन मिळताच पुन्हा अटक कशी झाली?

दरम्यान, बदलापूर अत्याचार प्रकरणात दोन पीडित आहेत. या सहआरोपींना दोन गुन्हे दाखल झाले आहेत. एका गुन्ह्यात शाळेच्या संचालकांना अटक झाली. त्या गुन्ह्यात कोर्टाने जामीन दिली. त्यानंतर दुसऱ्या पीडितेच्या गुन्ह्यात दोन्ही संचालकांना त्वरित अटक केली.