सुशांत सावंत -

मुंबई: मुंबई क्रिकेट असोसिएशन अध्यक्षपदासाठी होणाऱ्या निवडणुकीच्या शर्यतीत रंगतदार होण्याची चिन्हे आहेत. कारण भाजप नेते आशिष शेलार (Ashish Shelar) यांनी देखील अध्यक्ष पदासाठी आपला उमेदवारी अर्ज दाखल केला आहे. तर शरद पवार गटाकडून याआधीच संदीप पाटील यांनी अर्ज भरला आहे.

त्यामुळे शरद पवार (Sharad Pawar) यांच्या विरोधात आशिष शेलार निवडणुकीसाठी सज्ज झाल्याचं पाहायला मिळतं आहे. मुंबई क्रिकेट असोसिएशन (Mumbai Cricket Association) अध्यक्षपदासाठी उमेदवारी अर्ज भरण्याची मुदत आज संपत असून 20 ऑक्टोबरला एमसीएची निवडणूक होणार आहे. त्यामुळे आता इच्छुकांच्या हालचालींना वेग आला आहे.

पाहा व्हिडीओ -

दरम्यान, मिलिंद नार्वेकर आणि जितेंद्र आव्हाड (Milind Narvekar and Jitendra Awad) हे दोघेही एमसीए निवडणूकीच्या रिंगणात उतरले असून नार्वेकर आणि आव्हाड यांनी स्वतंत्र अर्ज भरले आहेत. तर विहंग सरनाईक यांनी मुंबई प्रीमिअर लीगसाठी अर्ज भरला आहे.

एमसीएच्या निवडणुकीसाठी माजी आयसीसी आणि बीसीसीआय अध्यक्ष शरद पवार यांचा गट सज्ज झाला आहे. विविध पदांसाठी या गटाने आपले उमेदवार निश्चित केले आहेत. त्यानुसार माजी क्रिकेटपटू संदीप पाटील हे अध्यक्षपदासाठी उभे राहणार आहेत.

तर उपाध्यक्षपदासाठी नवीन शेट्टी यांचे नाव आहे. तर सचिव पदासाठी अजिंक्य नाईक सहसचिव पदासाठी गौरव पय्याडे आणि खजिनदार पदासाठी जगदीश आचरेकर हे निवडणूकीच्या मैदानात आहेत.