Pimpri Chinchwad woman found dead hanging : पिंपरी-चिंचवडमध्ये हुंड्याच्या छळामुळे आणखी एका तरुणीचा मृत्यू झाल्याची धक्कादायक घटना समोर आली आहे. सासरच्या मंडळींवर याप्रकरणात गंभीर आरोप करण्यात आले आहेत. दिव्या हर्षल सूर्यवंशी असे मृत्यू झालेल्या महिलेचे नाव आहे. वाकड पोलीस स्टेशन हद्दीतील W-57 सोसायटीत 26 वर्षीय दिव्या हर्षल सूर्यवंशी हिचा राहत्या घरात गळफास लागलेल्या अवस्थेत मृतदेह आढळला. ही आत्महत्या नसून खून असल्याचा गंभीर आरोप दिव्याच्या माहेरच्या नातेवाईकांनी केला आहे. याप्रकरणी दिव्याचे पती हर्षल शांताराम सूर्यवंशी आणि सासरच्या मंडळींविरोधात वाकड पोलीस स्टेशनमध्ये गुन्हा दाखल करण्यात येत आहे.

दिव्याच्या माहेरच्या कुटुंबीयांचा दावा आहे की, तिला सातत्याने हुंड्यासाठी छळले जात होते. सासरच्या मंडळींकडून होणाऱ्या मानसिक आणि शारीरिक त्रास होत होता. दिव्याचा पती आणि सासरच्या कुटुंबीयांनी तिचा खून केला आहे. यापूर्वीही पिंपरी-चिंचवड परिसरात हुंड्याच्या छळामुळे वैष्णवी नावाच्या तरुणीचा बळी गेल्याची घटना घडली होती. त्यानंतर आता आणखी एक हुंडाबळीचा प्रकार समोर आला आहे.

दिव्याच्या मृत्यूप्रकरणी वाकड पोलिसांनी तपास सुरू केला आहे. मृतदेह पोस्टमार्टमसाठी पाठवण्यात आला आहे. दिव्याच्या कुटुंबांच्या तक्रारीनुसार पोलिसांनी गुन्हा दाखल केला असून तपास सुरू केला आहे. प्राथमिक तपासात पोलिसांनी घटनास्थळाची पाहणी केली असून, सासरच्या मंडळींची चौकशी सुरू आहे. या घटनेमुळे परिसरात खळबळ उडाली असून, हुंडाबळीच्या घटनांवरून पुन्हा एकदा संतापाची लाट पसरली आहे.