संजय गडदे, साम टीव्ही

मुंबई: अंधेरी रेल्वे पोलिसांनी तत्परता आणि प्रामाणिकतेचे उदाहरण दाखवत चर्चगेट-विरार लोकलमध्ये विसरलेली तब्बल १० लाख ९५ हजार रुपये किमतीची बॅग शोधून प्रवाशाला परत केली. या बॅगेत ७ तोळे सोन्याचे दागिने तसेच सुमारे ४५ हजार रुपये किमतीचा डीएसएलआर कॅमेरा होता.

मिळालेल्या माहितीनुसार, फिर्यादी पोशील/१७४३ खोडे हे २४ मे रोजी रात्री ११.४६ वाजताच्या चर्चगेट-विरार फास्ट लोकलने प्रवास करत होते. प्रवासादरम्यान त्यांनी आपली बॅग चुकून डब्यातच विसरली. बॅग हरवल्याचे लक्षात येताच त्यांनी तात्काळ रेल्वे पोलिसांशी संपर्क साधला.

अंधेरी रेल्वे पोलिसांनी तातडीने तपास सुरू करत आरपीएफ कंट्रोलला माहिती दिली. सीसीटीव्ही फुटेज आणि तांत्रिक तपासाच्या आधारे बॅगचा शोध घेण्यात आला. अखेर बॅग सुरक्षित अवस्थेत मिळाली. तपासादरम्यान बॅगेत ७ तोळे सोन्याचे दागिने, ज्यांची किंमत सुमारे १० लाख ५० हजार रुपये होती, तसेच अंदाजे ४५ हजार रुपये किमतीचा डीएसएलआर कॅमेरा असल्याचे आढळले.

एकूण १० लाख ९५ हजार रुपये किमतीचे मौल्यवान साहित्य संबंधित प्रवाशाला सुखरूप परत करण्यात आले. या कामगिरीबद्दल रेल्वे पोलिसांचे कौतुक होत आहे. रेल्वे पोलिसांनी प्रवाशांना प्रवासादरम्यान आपल्या मौल्यवान वस्तू आणि सामानाची विशेष काळजी घेण्याचे आवाहन अंधेरी लोहमार्ग पोलीस ठाण्याचे वरीष्ठ पोलिस निरीक्षक नितीन लोंढे यांनी केले आहे.