पुणे महापालिका निवडणुकीवरून राज्याच्या मुख्यमंत्री आणि उपमुख्यमंत्र्यांमध्येच जुंपल्याचं चित्र महाराष्ट्रानं बघितलं. आपल्या जाहीरनाम्यात अजित पवारांनी मोफत मेट्रो आणि बस प्रवासाचं आश्वासन दिलं आणि त्यांच्या सत्तेतल्या मित्रांनीच त्यांच्यावर टीकेची झोड उठवली. 'खिशात नाही आणा आणि मला बाजीराव म्हणा' अशी टीका फडणवीसांनी केल्यानंतर अजित पवारांनी पुण्याचा बाजीराव मीच, असं म्हणत प्रत्युत्तर दिलं.

याआधीही फडणवीसांनी अजित पवार यांच्या मोफत मेट्रो प्रवासाच्या आश्वासनाची खिल्ली उडवली होती. तेव्हा त्यावेळीही जिंकून आलो की करून दाखवेन, असं म्हणत अजित पवारांनी फडणवीसांनाच आव्हान दिलं..

मेट्रोचा मुद्दा का तापला?

पुण्यात आयटी हब आणि विद्यार्थ्यांची संख्या जास्त

वाहतूक कोंडी हा पुणेकरांचा कळीचा मुद्दा

वाहतुक कोंडीच्या वाढत्या समस्येवर मोफत मेट्रोचं आश्वासनं

महत्त्वाचा मुद्दा दादांनी हायजॅक केल्यानं भाजपकडून पलटवार

पुणे आणि पिंपरी-चिंचवड महापालिका राष्ट्रवादीचा बालेकिल्ला मानला जातो...मात्र 2017 च्या निवडणुकीत राष्ट्रवादीचा हा बालेकिल्ला भाजपच्या ताब्यात गेला. हा बालेकिल्ला पुन्हा काबीज करण्यासाठी दादा आक्रमक झाले असतानाच आपली सत्ता टिकवण्यासाठी भाजपनं कंबर कसलीय..मात्र दोन्ही राष्ट्रवादी एकत्र आल्यानं आणि अजित पवारांनी प्रचार काळात आपला मुक्काम पुण्यातच कायम ठेवल्यानं भाजपपुढे मोठं आव्हानं उभं राहिलयं...त्यातूनच मेट्रोच्या श्रेयवादापासून मोफत मेट्रोच्या आश्वासनापर्यंत आरोप-प्रत्यारोपाला जोर चढलाय... त्यामुळे ग्लोबल ग्रोथ हब असणाऱ्या पुणे आणि पिंपरी-चिंचवडचा बाजीराव नेमका कोण हे कळण्यासाठी अवघे दोन दिवस बाकी आहेत ..