मुंबई : शिवसैनिकांचं जसं दसरा मेळाव्याकडे लक्ष असतं तसंच बारामतीतील पवारांच्या पाडव्याचं कार्यकर्त्यांना विशेष आकर्षण असतं. गेल्या अनेक दशकापासून दिवाळीच्या निमित्तानं पाडव्याच्या दिवशी शरद पवार बारामतीत गोविंद बागेत आपल्या कार्यकर्त्यांना भेटतात. जगाच्या पाठीवर पवार कुठेही असले तरी दिवाळीला मात्र बारामतीत येऊन आपल्या कार्यकर्त्यांना भेटतात.यंदा मात्र ही परंपरा खंडित झाली अन् पवारांच्या बारामतीत दोन राष्ट्रवादीप्रमाणे दोन पाडवेही पाहायला मिळाले.

शिवसेना फुटल्यानंतर जसे शिंदे आणि ठाकरेंचे दोन दसरा मेळावे झाले अगदी तसेच आजही बारामतीत तसेच दोन पाडवे झाले. अर्थातच दोन्ही पाडव्यांमध्ये कार्यकर्त्यांची गर्दी मात्र जोरदार होती. मात्र, पवारांची भाऊबीज मात्र एकच होणार असल्याचं खुद्द अजित पवारांनी म्हटलंय.

गेल्या वर्षभरात पवार कुटुंबातील संबंध प्रचंड ताणले गेले हे वेगळं सांगायला नको. अजित पवार पवारांची साथ सोडत थेट सत्तेत सामिल झाले आणि वातावरणपुर्ण बदललं. अजितदादांनी राष्ट्रवादीवरच थेट दावा करत पक्ष आणि चिन्ह मिळवलं, बारामती लोकसभेला बहिण सुप्रिया सुळेंच्या विरोधात आपली पत्नी सनेत्रा पवारांना उभं करुन शरद पवारांना खुल्लं आव्हान दिलं.

आता शरद पवारांनी देखील अजित पवारांना शह देण्यासाठी थेट योगेंद्र पवारांना अजित दादांविरोधात उभं करुन आणि आज पाडव्याला शेजारी बसवून बारामतीकरांना नव्या दादाची ओळख करुन दिली असं म्हटलं तर चुकीचं ठरणार नाही.