भूषण शिंदे -

मुंबई: ऋतुजा लटके (Rutuja Latake) यांच्याकडून पोट निवडणूक लढवणार मात्र, नंतर त्यांना मातोश्रीवर एन्ट्री सुद्धा देणार नाहीत असा आरोप शिंदे गटाचे प्रवक्ते किरण पावसकर यांनी केला आहे.

ते अंधेरी पूर्व विधानसभा पोटनिवडणुकीच्या ठाकरे गटाच्या उमेदवार ऋतुजा लटके यांच्या राजीनामा प्रकरणावर भाष्य प्रतिक्रिया देत होते. यावेळी त्यांनी शिंदे गटाकडून लटके यांच्यावर कसलाही दबाव नसल्याचंही त्यांनी सांगितलं. (Andheri East Assembly by-election)

पावसकर (Kiran Pavaskar) म्हणाले, जर कोणाला कामावर भरती करायची असेल तर दबाव आणला जाऊ शकतो. ते आपण समजू शकतो. पण कोणाला स्वच्छेने कामावरुन जायचं असेल तर त्याच्यावर कसा आणि कोण दबाव आणू शकतो असं पावसकर म्हणाले.

पाहा व्हिडीओ -

शिवाय या प्रकरणामध्ये शिंदे गटाचा कसलाही दबाव नाही. मात्र, अशा प्रकारच वातावरण तयार करण्यामागे उद्धव ठाकरे (Uddhav Thackeray) यांचा काय उद्देश आहे हे मला माहीत नाही. शिवाय लटके यांचा पती आमदार होता, त्यांच्यावर अशी वेळ आली की, त्यांना सांगावे लागतं 'मी शिंदे गटाला भेटली नाही' हे दुदैवी आहे. असं एखाद्या दिवंगत आमदाराच्या पत्नीला त्रास देणं योग्य नाही. शिवाय अशा प्रकारे ठाकरे गट जो छळवाद करत आहे तो योग्य नसल्याचंही पावसकर म्हणाले.

तसंच ऋतुजा लटके शिंदे गटाकडे आलेल्या नाहीत, भेटलेल्या नाहीत तरी देखील असा अफवा पसरवल्या जात आहेत. इतक्या खालच्या पातळीचे राजकारण शिंदे साहेब करणार नाहीत. मात्र, असं राजकारण उद्धव ठाकरे यांनी अनेक वेळा केलं असून त्याचे मी शंभर पुरावे देईल असा दावा देखील त्यांनी केला.

दरम्यान,आमदार बाळा सावंत यांचे कर्करोगाने निधन झालं त्यावेळी त्यांची पत्नी तृप्ती सावंत यांनी पोट निवडणूक लढवली आणि त्या जिंकल्या पण 2019 मध्ये जेव्हा पुन्हा उमेदवारी द्यायची वेळ आली तेव्हा त्यांना मातोश्री मध्ये वेळ सुद्धा दिली नाही आणि आता सुद्धा हेच करणार, निवडणूक लढवणार आणि नंतर त्यांना मातोश्री वर इंट्री सुद्धा देणार नाहीत असा गंभीर आरोप देखील पावसकरांनी केला.