डोंबिवली: कल्याणमध्ये (Kalyan) धक्कादायक प्रकार उघडकीस आला आहे. कल्याणमधील कॉसमॉस बँकेच्या शाखेत गृहकर्ज काढण्यासाठी बनावट कागदपत्रे सादर करून दोन खासगी कंपन्या, २६ कर्जदार आणि विकसकाने बँकेची (Bank) तब्बल ६ कोटी ३० लाख रुपयांची फसवणूक केली आहे.

या प्रकरणी खडकपाडा पोलीस ठाण्यात (Khadakpada Police Station) तक्रार दाखल करण्यात आली आहे. या घटनेचा अधिक तपास आर्थिक गुन्हे शाखेकडे देण्यात आला. कल्याणमधील कॉसमॉस बँकेला कोरवी अॅग्रो कंपनीचे संचालक कोकरे आणि क्रक्स रीक्स मॅनेजमेंट या कंपनीचे संचालक, २६ कर्जदार, श्री सिध्दीविनायक डेव्हलपर्स, श्री साईराज बिल्डर, साई सृष्टी बिल्डर, संस्कृती बिल्डर्स, आणि कर्ज मंजुरीतील मध्यस्थ उमेश भाईप यांनी संगमनत करुन कोट्यवधी रुपयांना गंडा घातला आहे.

पाहा व्हिडीओ -

हा सर्व प्रकार बँकेचे वरिष्ठ अधिकारी शरद बेदाडे यांच्या निदर्शनास येताच त्यांनी यासंदर्भातील तक्रार खडकपाडा पोलीस ठाण्यात दाखल केली. या तक्रारीवरुन पोलिसांनी गुन्हा दाखल करत तपास सुरू केला. अधिक तपासासाठी आर्थिक गुन्हे अन्वेषण विभागाकडे तो सोपवण्यात आला आहे.