अभिजीत देशमुख, कल्याण

Kalyan Latest News: कल्याणमध्ये उल्हास नदीमध्ये (Ulhas River) दोन तरुण बुडाल्याची घटना समोर आली आहे. कल्याणच्या (Kalyan) मोहनेजवळ ही घटना घडली आहे. पोहण्यासाठी नदीत उतरलेला तरुण बुडू लागल्यामुळे त्याला वाचवण्यासाठी गेलेला दुसरा तरुणही बुडाला आहे. पाण्याच्या प्रवाहासोबत हे तरुण वाहून गेले. अग्निशमन दलाकडून त्यांचा शोध सुरु आहे.

मिळालेल्या माहितीनुसार, कल्याणजवळील मोहने परिसरातील उल्हास नदीवर दोघे तरुण कपडे धुण्यासाठी आणि आंघोळीसाठी गेले होते. यामधील एक तरुण नदीत पोहण्यासाठी उतरला. तो बुडू लागल्याने त्याला वाचविण्यासाठी दुसरा तरुण नदीत उतरला. मात्र पाण्याच्या प्रवाह असल्याने दोघेही नदीच्या पाण्याच्या प्रवाहात वाहून गेले.

उल्हासनगरच्या शांतीनगर परिसरात राहणारे सलमान अन्सारी आणि सरफराज अन्सारी हे दोघे कपडे धुण्यासाठी आणि अंघोळीसाठी उल्हास नदीवर गेले होते. हे दोघे नातेवाईक होते. सर्फराज हा उल्हास नदीत पोहण्यासाठी उतरला होता. त्याला पाण्याचा अंदाज न आल्याने तो बुडू लागला. हे पाहताच सलमानने नदीत उडी घेत त्याला वाचवण्याचा प्रयत्न केला. मात्र दोघे ही पाण्यात बुडाले.

सलमान अन्सारी आणि सरफराज अन्सारी असे बुडालेल्या दोघांची नावे आहेत. आज दुपारच्या सुमारस ही घटना घडली. घटनेची माहिती मिळताच कल्याण अग्निशमन विभाग आणि खडकपाडा पोलिसांनी घटनास्थळी धाव घेतली. अग्निशमन दलाने तात्काळ शोधकार्य सुरू केले आहे. गावकऱ्यांच्या मदतीने सध्या नदीत शोधकार्य सुरू आहेत. घटनास्थळावर मुलांच्या नातेवाईकांनी मोठी गर्दी केली आहे.