- मंगेश भांडेकर

Gadchiroli News : वीज दुरुस्तीसाठी खांबावर चढलेल्या 22 वर्षीय युवा कर्मचाऱ्याला जिवंत विद्युततारांचा झटका लागल्याने खांबावरच मृत्यू झाल्याची दुर्दैवी घटना गडचिरोली तालुक्यातील दर्शनी गावात आज (साेमवार) घडली. (Maharashtra News)

घटनास्थळावरुन मिळालेल्या माहितीनूसार या घटनेत मृत झालेल्या व्यक्तीचे नाव वैभव जेंगटे असे आहे. आज (साेमवार) सकाऴी आठच्या सुमारास वैभव हा वीज दुरुस्तीच्या कामासाठी दर्शन गावात पोहोचला. गावातील वीज बंद करून ताे खांबावर चढला.

त्यावेळी त्याने विद्युत तारांना स्पर्श केला असता त्याला झटका बसला आणि ताे तारांना चिकटून राहिला. दरम्यान जिवंत विद्युत तारांना वैभवचा स्पर्श झाला असावा आणि त्यातच त्याच्या खांबावरच मृत्यू झाला अशी प्राथमिक माहिती प्राप्त झाली आहे.

ही घटना घडताच गावकऱ्यांनी विद्युत खांबाच्या येथे मोठी गर्दी केली. या घटनेनंतर काहींनी याची माहिती पाेलिसांनी दिली. तसेच काही गावक-यांना विद्युत वितरण कंपनीस कळवले. दरम्यान बराच वेळ उलटूनही वीज विभागाचे कोणतेही अधिकारी गावात पोहोचले नव्हते.

Edited By : Siddharth Latkar