संदीप भोसले, लातूर

लातूरमध्ये पोलिस भरतीची तयारी करणाऱ्या तरुणाने आपल्या जन्मदात्या बापाची निर्घृण हत्या केली. पोलिस भरतीच्या फीसाठी पैसे न दिल्याने संतापलेल्या तरुणाने बापाला जागीच संपवलं. लातूरच्या चाकूर तालुक्यातील हिंपळनेर गावामध्ये ही घटना घडली. या प्रकरणी पोलिसांनी आरोपी तरुणाला अटक केली असून पुढील तपास करत आहेत. या घटनेमुळे लातूर जिल्हा हादरला आहे.

मिळालेल्या माहितीनुसार, पोलिस भरतीसाठी पैसे न देता घरातील सिलेंडरसाठी पैसे दिले. या रागातून तरुणाने आपल्या वडिलांना मारहाण केली. काठीने मारहाण करत असताना वडिलांच्या डोक्याला गंभीर दुखापत झाली. गंभीर जखमी झालेल्या वडिलांना तात्काळ गावकऱ्यांनी रुग्णालयात नेले. पण उपचारापूर्वीच डॉक्टरांनी त्यांना मृत घोषीत केले.

काशिनाथ पांचाळ (वय ७० वर्षे) असं हत्या करण्यात आलेल्या व्यक्तीचे नाव आहे. तर अजय काशिनाथ पांचाळ (वय २४ वर्षे) असं आरोपीचे नाव आहे. काशिनाथ भाजीपाला विक्रीचा व्यवसाय करत होते. पण सतत पडणाऱ्या पावसामुळे त्यांच्या व्यवसायावर परिणाम झाला होता. त्यामुळे ते आर्थिक अडचणीत होते.

काशिनाथ यांचा मुलगा चापोली येथे महाविद्यालयात शिक्षण घेत आहे. तो पोलिस भरतीची तयारी करत आहे. त्याने वडिलांकडे भरतीसाठी फी भरण्यासाठी पैसे मागितले होते. पण सतत पडणाऱ्या पावसामुळे घरातील चुलीसाठी वापरण्यात येणारी लाकडं भिजली होती. त्यात घरातील गॅसही संपला होता. त्यामुळे काशिनाथ यांनी बायकोला सिलेंडर खरेदीसाठी पैसे दिले.

यावरून काशिनाथ यांचा मुलगा त्यांना जाब विचारू लागला. यावरून त्यांच्यात भांडण झाले आणि रागाच्या भरात त्याने काशिनाथ यांच्या डोक्यात काठी मारली. या घटनेत अधिक रक्तस्राव होऊन त्यांचा मृत्यू झाला. या प्रकरणी चाकूर पोलिसांनी आरोपीविरोधात गुन्हा दाखल करत त्याला बेड्या ठोकल्या. पोलिस अधिक तपास करत आहेत.