सोलापूर शहरातून एक धक्कादायक घटना समोर आली आहे. जीव देण्यासाठी एका तरुणीने छत्रपती संभाजी महाराज तलावात उडी घेतली. यामुळे परिसरात एकच खळबळ उडाली. नागरिकांनी आरडाओरड सुरू केल्यानंतर बोटिंग क्लबमध्ये काम करणाऱ्या तरुणांनी पाण्यात उड्या घेतल्या.

वेळीच सतर्कता दाखवत तरुणांनी जीव देणाऱ्या तरुणीचे प्राण वाचवले. या संपूर्ण घटनेचा थरार कॅमेऱ्यात कैद झाला आहे. वैष्णवी असं तरुणीचं नाव आहे. तिने नेमकं इतकं टोकाचं पाऊल उचलण्याचा का प्रयत्न केला, याची माहिती अद्याप समोर आलेली नाही.

मिळालेल्या माहितीनुसार, सोलापूर शहरातील छत्रपती संभाजी महाराज तलावाजवळ सोमवारी दुपारच्या सुमारास एक तरुणी उभी होती. अचानक या तरुणीने पाण्यात उडी घेतली. हा प्रकार लक्षात येताच परिसरातील लोकांनी आरडाओरड सुरू केली.

तरुणीला वाचवण्यासाठी बोटिंग क्लबमध्ये काम करणाऱ्या तरुणांनी तत्काळ पाण्यात उड्या घेतल्या. जुबेर शेख, इलियास शेख, श्रीनिवास परदेशी यांनी वेळेचे भान ठेवून तरुणीला वाचवलं. हा संपूर्ण थरार कॅमेऱ्यात कैद झाला आहे. या घटनेमुळे परिसरात मोठी खळबळ उडाली आहे.