तबरेज शेख, नाशिक

Nashik News: नाशिकमध्ये गुन्हेगारीच्या (Nashik Crime) घटना दिवसेंदिवस वाढत चालल्या आहेत. अशामध्ये एका महिलेची निर्घृण हत्या करण्यात आल्याची घटना समोर आली आहे. नाशिक रोड परिसरातील शिंदे गावामध्ये ही घटना घडली आहे. या घटनेमुळे नाशिक पुन्हा हादरले आहे. या घटनेचा तपास नाशिक पोलिसांकडून (Nashik Police) सुरु आहे.

मिळालेल्या माहितीनुसार, नाशिक रोड परिसरातील शिंदे गावात राहणाऱ्या जनाबाई भिवाजी बेर्डे या महिलेवर धारदार चाकूने वार करून तिची निर्घृण हत्या करण्यात आली आहे. जनाबाई या मजुरीचे काम करायच्या. त्यांच्या अंगात देव येत असल्याने अनेक लोकं त्यांच्याकडे समस्यांच्या निराकरणासाठी यायचे. निकेश पवार हा तरुण देखील त्याची वैयक्तिक समस्या घेऊन जनाबाई यांच्याकडे वर्षभरापासून येत होता.

जनाबाई सांगायच्या त्याप्रमाणे निकेश उपाय करत होता. पण त्यांनी सांगितलेला उपाय करुन देखील निकेशला लाभ मिळवत नव्हता. त्याच्या एकाही समस्याचे निराकरण झाले नाही. उलट त्याच्या आयुष्यातील समस्या वाढल्या. त्यामुळे नैराश्येत आलेल्या निकेशने जनाबाई बर्डे यांच्यावर चाकूने वार केले. या हल्ल्यात गंभीर जखमी झालेल्या जनाबाई यांचा जागीच मृत्यू झाला.

या घटनेची माहिती मिळताच नाशिक रोड पोलिसांनी घटनास्थळी धाव घेतली. जनाबाई बर्डे यांचा मृतदेह ताब्यात घेऊन त्यांनी तो शवविच्छेदनासाठी रुग्णालयात पाठवला. याप्रकरणी पोलिसांनी आरोपी निकेश पवार याच्याविरोधात गुन्हा दाखल करत त्याला अटक केली. या प्रकरणाचा तपास पोलिसांकडून सुरु आहे. या घटनेमुळे नाशिकमध्ये एकच खळबळ उडाली आहे.

दरम्यान, नाशिकच्या सिन्नर तालुक्यातील सिन्नोडच्या दोडी आणि दापूर येथे शुक्रवारी मध्यरात्री दोन ठिकाणी घरफोडी झाल्याच्या घटना घडल्या. यात दोन ठिकाणी घरातील सदस्यांना बेदम मारहाण करण्यात आली. या मारहाणीमध्ये दोन महिला जखमी झाल्या आहेत. या दोन्ही महिलांवर खासगी रुग्णालयात उपचार सुरु आहेत. या घटनेने परिसरात खळबळ उडाली आहे.