संजय राठोड 
यवतमाळ : रोजच्या वापरातील खाद्य तेलाचा सर्वाधिक विकल्या जाणाऱ्या बॅन्डचे बनावट डबे तयार करून त्याची सर्रास विक्री सुरू होती. हा प्रकार अधिकृत कंपनीच्या लक्षात आल्यानंतर कंपनीचे पथक यवतमाळात दाखल होत पोलिसांच्या मदतीने धाड टाकली. यात यवतमाळ स्थानिक गुन्हे शाखेच्या पथकाने दुकानदारांवर कारवाई केली आहे. 

रोजच्या वापरात असलेले खाद्य तेल नागरिकांकडून खरेदी केले जात असते. चांगल्या प्रतीचे तेल देणाऱ्या विशिष्ट कंपनीचे तेल खरेदी करून वापरत असतात. मात्र त्याच कंपनीचे तांबे बनवून बनावट खाद्य तेल विक्री करण्याचा प्रकार (Yavatmal) यवतमाळमध्ये सुरु होता. सदरचा प्रकार कंपनी प्रतिनिधींना माहिती झाल्यानंतर त्यांनी चार दिवस मुख्य बाजारपेठेसह शहराच्या विविध भागांत सर्व्हे केला. या नंतर पोलिसांच्या (Police) मदतीने धाडसत्र राबविले. 

तेल जप्त करत गुन्हा दाखल 

यामध्ये बनावट तेलाचे डबे जप्त करण्यात आले असून या कारवाईने शहरात एकच खळबळ उडाली आहे. बॅन्डच्या नावाने बनावट तेलाचे डबे विकणाऱ्या व्यापाऱ्यांनी सावध पवित्रा घेत हातवर केले आहे. आम्ही ठोक विक्रेत्याकडून तेलाचे डबे आणले आहे. हुबेहुब बॅन्डसारखे दिसतात. यातील फरक ओळखू शकत नाही, असे सांगितले. या प्रकरणात तेल जप्त करून विक्रेत्यांविरुद्ध यवतमाळ शहर पोलिस ठाण्यात गुन्हा दाखल करण्यात आला.