-- संजय राठोड

यवतमाळ - यवतमाळ शहरातील संभाव्य प्रभागरचना डोळ्यासमोर ठेवून राजकीय पक्षांकडून उमेदवारांची चाचपणी सुरू आहे. जुन्या नव्या चेहऱ्यांची सरमिसळ कशी करायची यावर लक्ष केंद्रित केले आहे. तर, कायम सत्तेच्या बाजूने राहणाऱ्या संधी साधूंनकडूनही आता कोणत्या पक्ष निवडायचा याचे आराखडे बांधले जात आहे. सध्या तरी इच्छुक उमेदवार व राजकीय पक्ष यांच्याकडून सर्व पडताळणी केली जात आहे.

हे देखील पहा :

यवतमाळ नगरपरिषदेची निवडणूक काही महिन्यात होऊ घातली आहे. नव्या आदेशाप्रमाणे सदस्य संख्या निश्चित केली जात आहे. एक लाखापर्यंत लोकसंख्येसाठी चाळीस व त्यानंतर आठ हजार मागे एक असे प्रमाण आहे. त्यानुसार यवतमाळ नगर पालिकेची सदस्य संख्याही ५८ किंवा जास्तीत जास्त ५९ इतकी होण्याचे संकेत आहे. यवतमाळ नगरपरिषद मध्ये ५६ नगरसेवक असून भाजपची सत्ता आहे. भाजप कडे २९ नगरसेवक आहेत. तर नगराध्यक्ष शिवसेनेचा आहे. सातत्याने या पालिकेवर भाजपने सत्ता स्थापित केली आहे. काँग्रेसला बऱ्याच दशकांपासून पालिकेतील सत्तेत संधी मिळालेली नाही.

नगरपरिषद प्रभाग रचनेसोबतच सदस्य संख्या वाढली जाणार आहे. शहराची लोकसंख्या दोन लाख ४८ हजार ९३९ इतकी गृहीत धरली जाणार आहे. यवतमाळ नगर परिषदेतील पक्षीय बलाबल संख्या भाजप २९, शिवसेना ८, राष्ट्रवादी काँग्रेस ४, काँग्रेस १२, बीएसपी २ आणि अपक्ष एक एकुण ५६ नगरसेवक आहे. नगराध्यक्ष शिवसेनेचा जरी असला तरी पालिकेत भाजपची सत्ता आहे. मात्र शहरातील रस्त्यावर मोठ्या प्रमाणात खड्डे पडल्याने नागरिकांना रस्त्यावरून ये-जा करताना प्रचंड त्रास सहन करावा लागतो आहे. नाट्यगृह, उद्यान आणि डम्पिंग चा प्रश्न अद्याप सुटलेला नाही आहे.

Edited By : Krushnarav Sathe