मंत्रिपद मिळाल्यापासून सातत्याने वादाच्या भोवऱ्यात अडकणारे कृषिमंत्र्यांचा पाय आणखी खोलात गेलाय... राज्यात शेतकरी संकटात असताना सभागृहात जंगली रमी खेळणं कृषिमंत्री कोकाटेंवर चांगलंच शेकण्याची शक्यता आहे... कारण रमीबाज कोकाटेंची हकालपट्टीचे संकेत राष्ट्रवादीचे प्रदेशाध्यक्ष सुनील तटकरेंनी दिलेत.

खरंतर पावसाळी अधिवेशनात कृषिमंत्री माणिकराव कोकाटे यांचा जंगली रमी खेळत असल्याचा व्हिडीओ रोहित पवारांनी ट्वीट केला. त्याचे राज्यभर तीव्र पडसाद उमटले... अजित पवारांनी कोकाटेंच्या कृत्याबद्दल नाराजी व्यक्त केली... तर त्यानंतर विरोधकांनी कोकाटेंच्या राजीनाम्याची मागणी लावून धरलीय...

शेतकऱ्यांविषयी असंवेदनशील वक्तव्यांनी कोकाटे यापूर्वीच वादात अडकले आहेत. त्यावरुन मुख्यमंत्र्यांनीही त्यांना समज दिली होती. शेतकरी विरोधी वक्तव्यामुळे आगामी स्थानिक स्वराज्य संस्थांच्या निवडणुकीत फटका बसण्याची शक्यता असल्यानेच डॅमेज कंट्रोलसाठी कोकाटेंना नारळ दिला जाणार का? याकडे सगळ्याचं लक्ष आहे.