सध्या सर्वाधिक लोकांचा कल हा डिजिटल युगाकडे आहे. हा वर्ग वाचनापेक्षा व्हिडिओ आणि दृकश्राव्य माध्यमांकडे जास्त आकर्षित होतो. असे असतानाही ‘सकाळ’ने आपला वाचकवर्ग टिकवून ठेवण्यात यश मिळवले आहे. ऑनलाइन माध्यमांमध्ये ई-सकाळच्या वाचकसंख्येत सातत्याने वाढ होत असून, न्यूज पोर्टलने आपले अव्वल स्थान कायम राखले आहे. याला कारणीभूत आहे बातमीतील सत्यता.

कॉमस्कोर मल्टी-प्लॅटफॉर्मच्या ताज्या आकडेवारीनुसार, ई-सकाळ (esakal.com) हे सर्वाधिक वाचकसंख्या असलेले न्यूज पोर्टल ठरले आहे. विशेष म्हणजे, गेले कित्येक महिने ई-सकाळने पहिल्या क्रमांकावर विजयाचा झेंडा रोवला आहे. डिजिटल पत्रकारितेच्या स्पर्धात्मक वातावरणात मिळालेले हे यश महत्त्वाचे मानले जात आहे.

ई-सकाळच्या डिजिटल नेटवर्कमध्ये गोमंतक, साम, अॅग्रोवन आणि सकाळ यांसारख्या विविध वेब पोर्टल्सचा समावेश आहे. या माध्यमांद्वारे राज्यासह देश-विदेशातील घडामोडी, राजकारण, शेती, अर्थकारण आणि इतर महत्त्वाच्या विषयांवरील ताज्या बातम्या वाचकांपर्यंत पोहोचवल्या जातात.

विश्वासार्हता, अचूक माहिती आणि वाचकांच्या गरजांना प्राधान्य देणे, ही ई-सकाळच्या पत्रकारितेची वैशिष्ट्ये आहेत. वाचकांना दैनंदिन जीवनात उपयुक्त ठरणारी माहिती वेळेवर देण्यावर भर दिला जातो. वाचकांचा वाढता प्रतिसाद आणि विश्वास यामुळे ई-सकाळने डिजिटल विश्वात आपले अव्वल स्थान पुन्हा एकदा अधोरेखित केले आहे.