न्याय प्रक्रियेत दोन ओळींचा फायदा पिक विमा कंपन्या घेत असल्याने शेतकऱ्यांना पिक विमा मिळाला नाही. जर शेतकऱ्यांना लवकरात लवकर पिक विमा मिळाला नाही तर आम्ही मुंबईतील पिक विम्याचे ऑफिस ठिकाण्यावर ठेवणार नाही. आमचा मोर्चा मुंबईच्या दिशेने निघेल असा इशारा शेतकरी नेते रविकांत तुपकर यांनी आज (साेमवार) बुलढाणा येथे साम टीव्हीशी बाेलताना राज्य सरकारला दिला.

रविकांत तुपकर म्हणाले पिक विमा संदर्भात आम्ही कृषी मंत्री धनंजय मुंडे व कृषी सचिवांच भेट घेतली. त्यांना शेतक-यांना पिक विमा मिळत नसल्याची अडचणी सांगितल्या. राष्ट्रीयकृत बँका पिक कर्ज देण्यास टाळाटाळ करीत आहेत. कागदपत्रांची पूर्तता करून सुद्धा शेतकऱ्यांना त्रास देत आहे. बुलढाणा जिल्ह्यात फक्त 28 टक्के पिक कर्ज वाटप केले आहे. पेरण्या झाल्यावर पिक कर्ज देणार आहात काय असा सवाल तुपकर यांनी उपस्थित केला.

तुपकर पुढं बाेलताना म्हणाले कर्ज भरून घेताना हे बँका वाले गोड गोड बोलतात नंतर कर्ज देताना मात्र त्यात फाटे फोडतात. त्यामुळे असंख्य शेतकरी पिक कर्ज पासून वंचित राहत आहेत. पुनर्गठन करण्याची बोंब आहे, पुनर्गठन करण्याचे आदेश आहेत मात्र बँका पुनर्गठन करीत नाहीत. हे अतिशय दुर्दैवी आहे. सरकार नावाची यंत्रणा काय करत आहे, मुख्यमंत्री काय करताहेत, अर्थमंत्री व रिझर्व बँक काय करत आहे असा सवाल तुपकरांनी उपस्थित केला आहे.

Edited By : Siddharth Latkar