रायगड : व्हेल माशाच्या उलटी प्रकरणात अलिबाग तालुक्यातील निलंबित पोलीस कर्मचारी आणि एकाला असे दोघांना मुंबई गुन्हे पथकाने नुकतेच अटक केले असल्याची घटना ताजी असताना माणगाव तालुक्यातील लोणारे येथे तस्करीसाठी व्हेल माशाची उलटी घेऊन जात असताना रायगडच्या स्थानिक गुन्हे अन्वेषण विभागाने एकाला बेड्या ठोकल्या आहेत. पाच किलो वजनाची उलटी हस्तगत केली असून भारतीय बाजारात या उलटीची किंमत पाच कोटी रुपये आहे. Whale vomit worth 5 Crores seized

हे देखील पहा -

रत्नागिरीतील दापोली येथून व्हेल माशाची वांती म्हणजेच उलटी बाजारात तस्करी साठी येत असल्याची माहिती पोलीस अधीक्षक अशोक दुधे यांना समजली होती. त्यांच्या मार्गदनाखाली स्थानिक गुन्हे अन्वेषण विभागाच्या विशेष पथकाने माणगाव तालुक्‍यातील लोणेरे येथे सापळा रचला. खबऱ्याने दिलेल्या माहितीनुसार एका सिल्व्हर रंगाच्या स्कूटी वरून आलेल्या इसमाला थांबवून त्याचीचौकशी केली असता त्याच्या कडून पाच किलो वजनाची वांती म्हणजेच उलटी जप्त करण्यात आली.

भारतीय बाजारपेठेत या उलटीची किंमत पाच कोटी रूपये इतकी आहे तर आंतरराष्ट्रीय पातळीवर अंदाजे वीस कोटी रूपये किंमत असल्याचे बोलले जाते. सुगंधीत अत्तर बनविण्यासाठी या उलटीला मोठी मागणी असते. दुर्मिळ असलेल्या व्हेल माशाने खोल समुद्रात केलेली उलटी कालांतराने दगडा सारखी बनते या मध्ये आम्ब्रीन, अम्ब्रोक्झीन, अम्ब्रोनाॅल हि रसायने असतात.

Edited By : Krushnarav Sathe