मनोज जयस्वाल 
वाशीम : राज्यातील अनेक भागात बुधवारी सायंकाळच्या सुमारास वादळी वाऱ्याने जोरदार तडाखा दिला आहे. तर वाशिमच्या रिसोड तालुक्यात देखील वादळी वाऱ्याचा मोठ तांडव बघायला मिळाले आहे. वादळी वाऱ्यामुळे अनेक घरांचे छतं उडून गेली असून, मोठ्या प्रमाणात अनेक कुटुंबाच नुकसान झाले. आसेगाव पेन येथील चव्हाण कुटुंबावर घराचे संपूर्ण छत कोसळून पडल्यानं अख्ख कुटुंब या छताखाली दबलं होतं. यात दोन जण जखमी सुद्धा झाले आहेत.

राज्यातील बहुतांश भागात वादळी वाऱ्याचा जोरदार तडाखा बसला आहे. यामुळे अनेक ठिकाणी झाडे उन्मळून पडली आहेत. तर काही ठिकाणी घरांचे देखील नुकसान झाले आहे. त्यानुसार वाशिमच्या रिसोड तालुक्यातील वादळी वाऱ्याने आसेगाव पेन, बेलखेडा, व्याड या परिसरातील अनेक घरांची टिनपत्रे उडून नुकसान झाल आहे. अनेक कुटुंब उघड्यावर पडले आहे. छताखाली कुटुंब दाबले गेल्याने दोन जण जखमी झाले आहेत. 

वीज पडून गोठ्याला लागली आग 
जांब आढाव गावात काल सायंकाळी विष्णू भानुदास जाधव या शेतकऱ्याच्या शेतातील गोठ्यावर विज कोसळून गोठ्याला आग लागल्याची घटना घडली. या आगीमध्ये गोठ्यात ठेवलेले कृषी पंप, पाईप, केबल आणि जनावरांचा चारा जळून खाक झाले आहे. त्यामुळे शेतकऱ्याचं मोठं नुकसान झालं आहे. आज सकाळी प्रशासनाकडून अनेक घरांचे पंचनामे सुद्धा करण्यात आले आहेत. यावर आता प्रशासन काय मदत करत हे पाहणं महत्त्वाचं ठरणार आहे.

जळगावला वादळी पावसाने झोडपले
जळगाव : जळगाव शहर व परिसरात वादळी वाऱ्यासह मुसळधार पावसाने झोडपले. दिवसभर ढगाळ वातावरण राहिल्यानंतर सायंकाळी पावणे आठच्या सुमारास विजांच्या कडकडाटासह जोरदार वारा आणि पावसाच्या सरी कोसळल्या. मुसळधार पावसामुळे व वादळामुळे शहरात व जिल्ह्यात मोठ्या प्रमाणात नुकसान झाले आहे. वादळामुळे अनेक ठिकाणी वीज वाहिन्यांवर झाडे कोसळली. तर काही भागात वीज खांब वाकले.