मनोज जयस्वाल 
वाशीम : वाशिममधील महिला व बालविकास विभागाअंतर्गत चालणाऱ्या दिशा मुलींच्या निरीक्षण गृहातून सहा दिवसांपूर्वी एक १६ वर्षीय अल्वयीन मुलगी बेपत्ता झाली आहे. या मुलीने निरीक्षण गृहाच्या १२ फूट उंच भिंतीवरून उडी मारून पळ काढला आहे. सहा दिवसांपासून या मुलीचा शोध सुरु असून अद्याप तिचा तपास लागला नसून निरीक्षण गृहात खळबळ उडाली आहे. 

वाशिम शहरात पीपल्स एज्युकेशन सोसायटी संचालित महिला व बालविकास विभाग अंतर्गत अनुदानित दिशा मुलींचे निरीक्षण गृह आहे. अनाथ तसेच गुन्हेगारी प्रकरणांत सहभागी असलेल्या किंवा हरवलेल्या मुलींना संरक्षण दिले जाते. त्यानुसार अनेक मुली या निरीक्षण गृहात वास्तव्यात आहेत. दरम्यान या निरीक्षण गृहात राहणारी १६ वर्षीय अल्पवयीन मुलगी अचानक फरार झाल्याने खळबळ उडाली आहे. 

कपडे टाकण्याच्या बहाण्याने गेली गॅलरीत 

दरम्यान मिळालेल्या माहितीनुसार घटनेच्या दिवशी दुपारी निरीक्षण गृहाच्या वरच्या मजल्यावर कपडे वाळू घालण्याच्या बहाण्याने सदर मुलगी गॅलरीत आली. यानंतर तिने आजूबाजूला कोणी नसल्याची संधी साधत काही कळायच्या आत १२ फूट उंच भिंतीवरून उडी मारून पळून बाहेर पडली आणि फरार झाली आहे. तिचा शोध घेतला असता सापडून आली नसून तिचा कोणताच पत्ता अद्याप लागलेला नाही.

पोलिसात केली तक्रार 

निरीक्षण गृहातून मुलीने पलायन केल्याने खळबळ उडाली असून या प्रकरणी पोलिसांकडे तक्रार दाखल करण्यात आली आहे. पोलिसांकडून देखील तपास करत मुलीचा शोध घेण्यात आला. मात्र त्या अल्पवयीन मुलीचा कोणताही सुगावा लागलेला नाही. दरम्यान या घटनेमुळे केवळ प्रशासनावरच नव्हे; तर बाल संरक्षण यंत्रणेवरही गंभीर प्रश्न उपस्थित झाले आहेत.