मनोज जयस्वाल

वाशिम : शिवसेनेचे १६ आमदार अपात्र होतील. भाजप स्वतः हे घडवून आणेल. मुळात हे आमदार भाजपलाच नको आहेत. कुठल्याही परिस्थितीत एकनाथ शिंदेचे (Eknath Shinde) सरकार खाली खेचून देवेंद्र फडणवीस (Devendra Fadnavis) स्वतः मुख्यमंत्री होतील; असा आरोप बीआरएस पक्षाचे नेते तथा माजी खासदार हरिभाऊ राठोड यांनी केला आहे. (Maharashtra News)

राज्‍यात सध्‍या मोठी राजकीय घडामोड सुरू आहे. अजित पवार यांच्‍यासह राष्‍ट्रवादीच्‍या ३५ आमदारांनी भाजप– शिवसेनेसोबत हात मिळवणी केली. यानंतर रविवारी राजभवनात शपथविधी देखील पार पडला. यात अजित पवार यांनी उपमुख्‍यमंत्री पदाची तर इतर ८ आमदारांनी मंत्री पदाची शपथ घेतली. या सर्व घडामोडींवर माजी खासदार हरीभाऊ राठोड हे वाशीमच्या पोहरादेवी इथ आले असताना आपली प्रतिक्रीया दिली.

मुख्यमंत्री होण्यासाठीच घाट

कुठल्याही परिस्थितीत देवेंद्र फडणवीस यांना मुख्यमंत्री व्हायचे आहे. हे सर्व चित्र पुढे पहावयास मिळेल. देवेंद्र फडणवीस यांना एकनाथ शिंदेला बाजूला करून स्वतः मुख्यमंत्री व्हायचे आहे. यासाठीच त्यांनी तसा घाट घातला असल्‍याचे ते यावेळी म्हणाले.