मनोज जैस्वाल, साम टीव्ही

Washim Crime News: वाशिम जिल्ह्यातून एक भयानक घटना समोर आली आहे. वाशिमच्या मालेगाव तालुक्यात एका प्रेमीयुगुलाने गळफास घेऊन आपली जीवनयात्रा संपवली. जऊळका पोलीस स्टेशन अंतर्गत येणाऱ्या उमदरी वनपरिक्षेत्रात ही धक्कादायक घटना घडली. घटनेची माहिती मिळताच पोलिसांनी तातडीने घटनास्थळी धाव घेत प्रेमीयुगाचे मृतदेह ताब्यात घेतले. या घटनेनं परिसरातून हळहळ व्यक्त केली जात आहे. (Breaking Marathi News)

लक्ष्मी ठाकरे (वय 20 वर्ष रा.कुत्तरडोह) महादेव लोखंडे (वय 23 वर्ष रा कवरदरी) अशी मृत प्रेमीयुगालाची नावे आहेत. मिळालेल्या माहितीनुसार, लक्ष्मी आणि महादेव हे दोघेही वाशिम जिल्ह्यातील असून गेल्या काही वर्षांपासून त्यांचे एकमेकांवर प्रेम होते. मात्र, दोघांच्याही प्रेमाला कुटुंबियांचा विरोध होता.  (Latest Marathi News)

वारंवार विनंती करून सुद्धा कुटुंबिय त्यांच्या प्रेमाची मागणी मान्य करत नसल्याने शेवटी दोघांनाही घर सोडण्याचा निर्णय घेतला. काही दिवसांपूर्वी लक्ष्मी आणि महादेव कुणालाही न सांगता घरातून निघून गेले. दोघेही पळून गेल्याचं समजताच, कुटुंबियांनी पोलिसांत धाव घेतली.

दोघेही पुण्याला गेले असल्याची तक्रार कुटुंबियांकडून पोलिसांत (Police) करण्यात आली. दरम्यान, पोलिस लक्ष्मी आणि महादेव यांचा शोध घेत होते. मात्र, आज पहाटेच्या सुमारास दोघांचेही मृतदेह मालेगाव तालुक्यातील जऊळका पोलीस स्टेशन अंतर्गत येणाऱ्या उमदरी वनपरिक्षेत्रातील जंगलात गळफास घेतलेल्या अवस्थेत आढळून आले.

दरम्यान, स्थानिकांनी या घटनेची माहिती पोलिसांना दिली. माहिती मिळताच पोलिस घटनास्थळी दाखल झाले. पोलिसांनी दोघांचेही मृतदेह ताब्यात घेतले असून शवविच्छेदानासाठी पाठवले आहेत. या घटनेनं परिसरात मोठी खळबळ उडाली असून नागरिकांमधून हळहळ व्यक्त होत आहे. घटनेचा अधिक तपास जऊळका पोलीस स्टेशन पोलीस अधिकारी करत आहे.

Edited by - Satish Daud