चेतन व्यास 
वर्धा : कापसाची लागवड करण्यासाठी अद्याप काही दिवसांचा कालावधी असून बियाणे विक्रीच्या अनुषंगाने मार्केटमध्ये बियाणे आले आहेत. मात्र आतापासूनच मार्केटमध्ये बोगस बियाणे आणले जात आहेत. त्यानुसार राज्यात प्रतिबंध घातलेल्या एचटीबीटी बियाणांची चोरट्या मार्गाने साठवणूक करून पॅकेजिंग लेबलिंग करून विक्री करणाऱ्या कंपनीचा कृषी विभागाने पोलिस कर्मचाऱ्यांच्या साहाय्याने पर्दाफाश केला. 

वर्ध्याच्या मौजा टाकळी (झडशी) येथे गोपाल पारडकर याने प्रतिबंधित असलेले बनावटी कपाशीचे बियाणे गुजरात येथून आणत साठवणूक केली. एवढेच नाही तर कपाशी बियाणाचे पॅकिंग व लेबलिंग करून अवैद्यरीत्या चढ्या भावाने विक्री करून शेतकऱ्यांची आर्थिक फसवणूक करीत असल्याची माहिती कृषी विभागाला मिळाली. याबाबतची माहिती पोलिसांना देत सेलू येथील विकासनगरात एका प्लॉटवर, टीनाचे शेड तयार केलेल्या गोडाऊनवर छापा टाकला. 

छापा टाकत एकाला घेतले ताब्यात 

सेलू तालुक्यातील झडशी टाकळी येथे केली. कृषी विभागाने छापा टाकत केलेल्या कारवाईदरम्यान एक व्यक्ती कारमध्ये बनावट कपाशी बियाणाच्या पिशव्या भरताना रंगेहात मिळून आला. गोपाल सुरेश पारडकर (वय ३५, रा. टाकळी, झडशी) याला अटक केली. या ठिकाणाहून विविध कंपन्यांची पॅकेजिंग केलेली १४६६ पाकिटे, ११८५ किलो खुले बियाणे तसेच अन्य साहित्य, असा ५० लाख ३ हजार ३०० रुपयांचा मुद्देमाल जप्त केला. 

बोगस बियाणांचे गुजरात कनेक्शन 

दरम्यान गतवर्षी म्हसाळा परिसरात बोगस बियाणांच्या साठा जप्त केला होता. त्यातही गुजरात कनेक्शन समोर आले होते. आता झडशी टाकळी येथे केलेल्या कारवाईत पुन्हा गुजरात कनेक्शन पुढे आले आहे. जप्त केलेला मुद्देमाल गुजरात येथील जस्सूभाई पटेल यांच्याकडून खरेदी केल्याचे सांगण्यात आले आहे. पॅकिंग व लेबलिंग केलेला मुद्देमाल वेगवेगळ्या व्यक्तींना विक्री केला असल्याची माहिती आहे. याप्रकरणी सेलू पोलिसात गुन्हा नोंद केला असून, पुढील तपास पोलिस करीत आहेत.