चेतन व्यास, प्रतिनिधी...

Wardha News: वर्धा शहरासह जिल्ह्यात सध्या दुचाकी चोरट्यांनी धुमाकूळ घातला असतानाच स्थानिक गुन्हे शाखेने सापळा रचून चोरीच्या दुचाकी विकायला येणाऱ्या चोरट्यांच्या टोळीचा पर्दाफाश केला. वर्धेच्या दयालनगर परिसरातील रेल्वे प्रवेशद्वारासमोर करण्यात आलेल्या या कारवाईत चौघांना अटक करण्यात आली आहे. (Crime News In Marathi)

याबाबत सविस्तर माहिती अशी की, वर्ध्याच्या (Wardha) पुलगाव परिसरात दुचाकी चोरींच्या घटना वाढल्या होत्या. त्यानुसार पोलिस अधीक्षक नुरूल हसन यांनी स्थानिक गुन्हे शाखेला चोरीतील वाहनांचा शोध घेण्याच्या सूचना दिल्या होत्या. त्यानुसार चोरट्यांचा आणि दुचाकींचा शोध पोलिसांकडून कसोशीने घेतला जात होता.

याचकाळात पोलिस पथकाला चोरीची दुचाकी विकण्यासाठी दयालनगर परिसरात चोरटे येणार असल्याची माहिती मिळाली. त्यानुसार पोलिसांनी दयालनगर परिसरात सापळा रचला असता एका दुचाकीवर दोन संशयित व्यक्ती बसलेले दिसून आले.

पोलिसांनी त्यांची विचारपूस केली असता एकाने त्याचे नाव कौशिक तिवारी असल्याचे सांगितले तर दुसरा मुलगा अल्पवयीन होता. त्यांच्याकडे दुचाकीबाबत विचारणा करून पोलिसी खाक्या दाखवताच दुचाकी पुलगाव परिसरातून चोरल्याची कबुली दिली.

पोलिसांनी समांतर तपास करून पुलगाव परिसरातून सात चोरीतील दुचाकी विविध ठिकाणाहून हस्तगत केल्या. तसेच चोरीतील दुचाकी विक्री करण्यासाठी मदत करणाऱ्या राहुल दादाराव जाधव, रा. वडार झोपडपट्टी, गौतम कुंवरलाल मानेश्वर, रा. बोरगाव मेघे यांनाही अटक करण्यात आली. (Latest Marathi News)