राज्यात 29 महापालिकेची धामधूम सुरू असून मतदानाला अवघे काही तास शिल्लक असताना रविवारी जालना शहरातील सिंधी बाजार परिसरात असलेल्या सावरकर चौकात एका कचऱ्याच्या ढिगाऱ्यात 24 आधार कार्ड, पॅन कार्ड आणि मतदान ओळखपत्र सापडल्याने मोठी खळबळ माजली आहे.

मिळालेल्या महितीनुसार, सावरकर चौकात 17 आधार कार्ड, तीन पॅनकार्ड आणि चार मतदान कार्ड आढळून आल्याची तक्रार प्राप्त झाली होती. याची तात्काळ दखल घेत अतिरिक्त आयुक्त अर्जुन गिराम यांनी निवडणूक पथकाला पाठवत सदर प्रकरणाचा अहवाल सादर करण्याचे निर्देश दिले आहे.

डी एन हिवराळे हे निवडणूक भरारी पथकाचे प्रमुख असून त्यांनी घटनास्थळी भेट दिली. प्राथमिक तपासात ही सर्व कागदपत्र बोगस नसल्याचे आढळून आले. यामध्ये कुठलीही प्रत झेरॉक्स कॉपी नव्हती. यानंतर वरिष्ठ अधिकाऱ्यांच्या सूचनेनुसार हिवराळे यांनी पोलीस ठाण्यात तक्रार दाखल केली. भारतीय दंड न्यायसंहिता कलमा अंतर्गत कलम 223, 123 नुसार गुन्हा दाखल करण्यात आला आहे.

याबाबत उपजिल्हाधिकारी शशिकांत हदगल म्हणाले की, निवडणुकीशी संबंधित कागदपत्रे आणि मतदार ओलखपत्रांचा असा निष्काळजीपणा हा मोठा गुन्हा आहे. ऐन निवडणुकी दरम्यान असा प्रकार घडल्याने या घटनेची आम्ही गंभीर दखल घेतली आहे. अशा प्रकारामुळे निवडणुकीवर परिणाम होऊ शकतो.

तसेच या प्रकरणाची सखोल चौकशी केली जाईल आणि आम्ही याचा बारकाईने तपास करणार असल्याचे जालना शहराचे पोलीस आधीक्षक अजयकुमार बन्सल यांनी सांगितले. जालनाच्या जिल्हाधिकारी आशिमा मित्तल यांनी देखील प्रकरणाची गंभीर दखल घेतली असून त्या म्हणाल्या, निवडणूक आयोगाची यंत्रणा आम्ही सुरू केली आहे जी अशा घटनांची गंभीर दखल घेत असते आणि 24 तासात आलेल्या तक्रारींचे निवारण करतो.