>> सचिन कदम

अलिबाग : अलिबागच्या निसर्ग सौंदर्याची भुरळ सर्वच सेलिब्रेटींना पडली आहे. यामध्ये क्रिकेटपटू विराट कोहलीची आता भर पडली आहे. कारण विराट कोहली देखील अलिबागकर झाला आहे.

टीम इंडियाचा स्टार खेळाडू विराट कोहलीची कमाई नेहमीच चर्चेचा विषय असते. त्याच महागडं पिण्याचं पाणी असो वा मुंबईतील अलिशान घर. विराट कोहली विविध ठिकाणी गुंतवणूक करत असतो. (Latest Sports Updates)

विराटने आपल्या विकेंट हाऊससाठी अलिबागची निवड केली आहे. आवास लिव्हिंग अलिबाग एलएलपी या प्रकल्पात त्याने बंगला खरेदी केला आहे. आज त्याच्या अनुपस्थितीत त्याचा भाऊ विकास कोहली याने अलिबागच्या दुय्यम निबंधक कार्यालयात हा व्यवहार पूर्ण केला.

दोन हजार चौरस फुटाच्या या बंगल्याची किंमत तब्बल 6 कोटी रुपये इतकी आहे. यामध्ये 400 चौरस फुटांचा स्वीमिंग पूल देखील आहे. सचिन तेंडुलकर, रवि शास्त्री, अजित वाडेकर, रोहित शर्मा यांच्या पाठोपाठ आता विराट देखील अलिबागकर झाला आहे.