शिरूरमधील बावी या गावात अमानुष मारहाणीचा व्हिडिओ सोशल माध्यमांमध्ये व्हायरल झाला होता. महेश आणि दिलीप ढाकणे या बाप लेकावर मारहाण झाली होती. ही मारहाण भाजप पदाधिकारी सतीश भोसले आणि त्याच्या काही सहकाऱ्यांनी केली होती.

मारहाणीची घटना समोर आल्यानंतर आरोपीयांवर कारवाई झालीच पाहिजे, अशी मागणी गावकऱ्यांकडून करण्यात येत होती. अशातच सतीश उर्फ खोक्या भोसले याच्या मुसक्या आवळण्यासाठी वन विभागाकडून हालचाली सुरू झालेल्या आहेत.

ढाकणे पिता पुत्रावर मारहाण झाल्यानंतर सतीश भोसले हा नेमका कोण? असा प्रश्न निर्माण झाला होता. सतीश भोसले भाजपा पदाधिकारी असून, भाजपा आमदार सुरेश धस यांचा कट्टर समर्थक असल्याची माहिती समोर आली आहे. आजपर्यंत सतीश भोसलेनं अनेक वन्य प्राण्यांचा जीव घेतलाय. ज्यात हरण, काळवीट, ससे आणि मोरांचा समावेश आहे.

सतीश भोसले हरणांची शिकार करण्यासाठी जाळी लावायचा. बावी गावातील डोंगरपट्ट्यामध्ये जवळपास अनेक मुक्या प्राण्यांचा जीव भोसलेनं घेतला आहे. ढाकणे कुटुंबाच्या शेतातही त्यानं जाळी लावली होती. त्याला हरणाची शिकार करायची होती. मात्र, ढाकणे कुटुंबानं अडवल्यामुळे बाप लेकावर भोसलेनं हल्ला केला.

सतीश भोसले आणि त्याच्या साथीदारांनी मिळून शेतकरी दिलीप ढाकणे आणि मुलगा महेश ढाकणे यांच्यावर अमानूष मारहाण केली. त्यानंतर बाप लेकानं पोलीस ठाणे गाठत तक्रार दाखल केली. तक्रारीनुसार पोलीस ठाण्यात त्याच्यावर गुन्हा दाखल करण्यात आला आहे. सतीश उर्फ खोक्या भोसले याच्या मुसक्या आवळण्यासाठी वन विभागाकडून हालचाली सुरू झाल्या आहेत.

ज्या ठिकाणी हरणांची शिकार करण्यात येत होती, त्या स्पॉटवर स्वतः हजर राहून वन विभागाच्या वरिष्ठ अधिकाऱ्यांनी पाहणी केली आहे. पाहणीमध्ये एका हरणाची कवटी आणि शिंगाचा भाग सापडला आहे. गुन्हा दाखल करूनही या प्रकरणी भोसलेला अटक होणार कधी, असा प्रश्न निर्माण झाला आहे.