Mahavitran : कोणतीही कल्पना, नोटीस न देता महावितरणकडून बीड जिल्ह्यात कृषी पंपाचे वीज कनेक्शन ताेडण्याचा धडाका सुरू आहे. या विरोधात आता शेतकरी आक्रमक झाले आहेत. बीडच्या लिंबागणेश येथे पाटोदा - लातूर महामार्ग आडवत सामाजिक कार्यकर्ते गणेश ढवळे यांच्या नेतृत्वाखाली, शेतकऱ्यांनी चक्काजाम आंदोलन केलं.

बीड जिल्ह्य़ात झालेल्या अतिवृष्टीत खरीपातील सोयाबीन, कापूस आदी पिके हातची गेल्यामुळे शेतकरी आर्थिक संकटात सापडला आहे. या संकटात सापडलेल्या शेतकऱ्यांचे ऐन रब्बी हंगामात ज्वारी, गहु, हरबरा पिकांना पाणी देण्याची आवश्यकता असतानाच महावितरणकडुन थकीत विजबील वसुलीच्या नावाखाली कृषिपंपाचे वीज कनेक्शन तोडण्यात येत आहे.

अगोदरचं अस्मानी संकटात असताना आता पुन्हा सुलतानी संकट महावितरणने (mahavitran) निर्माण केलंय. त्यामुळं शेतक-यांना वेठीस धरणाऱ्या महावितरणच्या धोरणाच्या निषेधार्थ सामाजिक कार्यकर्ते डाॅ.गणेश ढवळे यांच्या नेतृत्वाखाली लिंबागणेश येथे पंचक्रोशीतील शेतक-यांनी पाटोदा- लातूर राष्ट्रीय महामार्ग अडवत "चक्काजाम आंदोलन केले.

दरम्यान शेतकऱ्यांचे (farmers) तोडलेले कनेक्शन परत जोडा आणि यानंतर कृषी पंपाचे वीज कनेक्शन तोडू नयेत. अन्यथा यापेक्षा तीव्र आंदोलन करण्यात येईल असा इशारा यावेळी देण्यात आला. (Maharashtra News)

Edited By : Siddharth Latkar